Respýblıka kúni: Túrkistanda 300-ge jýyq turǵyn baspanaly boldy
TÚRKІSTAN. KAZINFORM - Túrkistan qalasynda 260 páterli, 3 kópqabatty turǵyn úı el ıgiligine paıdalanýǵa berildi.
Turǵyndardyń qýanyshymen bólisken oblys ákimi Darhan Satybaldy azamattarǵa baspana kiltin tabys etti.
Túrkistan qalasynyń «Otyrar» sektory aýmaǵynda 20 turǵyn úıdiń qurylysy júrip jatyr. Onyń ishinde 9 turǵyn úıdi «Bastaý» korporatsııasy arqyly satyp alý jumystary júrgizilip, kezekte turǵan azamattarǵa úlestirilýde. Búgin 3 turǵyn úı 123 kópbalaly otbasyna, 129 halyqtyń «áleýmettik jaǵynan álsiz toptary» sanatyna enetin azamattarǵa jáne 8 jetim jáne ata-anasynyń qamqorlyǵynsyz qalǵan balaǵa berildi.
«Sizderdi Respýblıka kúnimen quttyqtaımyn! Egemen elimiz máńgi jasasyn! Osyndaı aıtýly mereke qarsańynda oblys ortalyǵynyń turǵyndary qýanyshqa bólenip otyr. Biz halyqty baspanamen qamtý baǵytyndaǵy jumystardy toqtatpaımyz. Bizden bir ǵana talap – aınalany taza ustap, tazalyqty saqtaý», – dedi oblys ákimi Darhan Satybaldy.
Qazirgi tańda Túrkistan qalasynyń turǵyn úı kezeginde baspanaǵa muqtaj 16 515 azamat bar. Jergilikti turǵyndardy baspanamen qamtý jumystary qarqyndy júrip jatyr. Bıyl oblys ortalyǵynda kezekte turǵan 222 otbasy arendalyq baspanamen qamtamasyz etiledi dep kútilýde.
Sonymen qatar jyl sońyna deıin kezektegi azamattardy turǵyn úımen qamtamasyz etý maqsatynda 1728 páterli 20 kópqabatty turǵyn úıdiń qurylysy júrgizilýde.
Osyǵan deıin Astanada Respýblıka kúnine oraı, demeýshilerdiń qoldaýymen merekelik otshashý uıymdastyrylǵanyn jazdyq.
