Respýblıka kúni: Shymkentte jeti otbasyǵa jańa páter berildi
ShYMKENT. KAZINFORM — Respýblıka kúni qarsańynda Shymkent qalasyndaǵy Nurlybaev kóshesi, № 22 tozyǵy jetken úıde turǵan 7 otbasy jańa páterlerdiń kiltine ıe boldy.
Shymkent qalasy ákiminiń baspasóz qyzmeti atap ótkendeı, qonys aýdarý Kóksaı shaǵynaýdanyn jańartý tujyrymdamasynyń bir kezeńi sanalatyn renovatsııa baǵdarlamasy aıasynda júzege asyrylyp jatyr.
Aıta keteıik, tujyrymdama iske asyryla bastaǵannan búginge deıin 135 otbasy jańa baspanaǵa qol jetkizdi. Páterler Shymkent City jáne Turan shaǵynaýdandaryndaǵy turǵyn úı keshenderinen berilip otyr.
Jańa páterler tolyq árlengen jáne qonystanýǵa daıyn. Turǵyndardy baspanamen qamtamasyz etý kezinde burynǵy páterleriniń aýdany men bólme sany eskeriledi.
Páter kiltterin tabystaý rásimine qala ákimi Ǵabıt Syzdyqbekov qatysty. Shahar basshysy otbasylardy mańyzdy oqıǵamen quttyqtap, jańa qonystarynda amandyq, otbasylyq bereke men jylýlyq tiledi.
Eske salaıyq, Kóksaı aýmaǵyn jańartý tujyrymdamasy baspana qoryn kezeń-kezeńimen jańartýdy ǵana emes, ınjenerlik ınfraqurylymdy damytýdy jáne qoǵamdyq keńistikterdi abattandyrýdy da kózdeıdi. Turǵyndardy kóshirý — aýmaqty jańartý men qala turǵyndarynyń ómir súrý sapasyn jaqsartýǵa baǵyttalǵan osy ózgeristerdiń mańyzdy bóligi.
