Respýblıka kúni: Kókshetaýda Ulttyq ulannyń jańa kazarmasy ashyldy
KÓKShETAÝ. KAZINFORM — Kókshetaý qalasynda Qazaqstan Respýblıkasy ІІM Ulttyq ulanynyń «Ortalyq» óńirlik qolbasshylyǵyna qarasty 5510 áskerı bóliminde zamanaýı jańa kazarmanyń ashylýy ótti.
Bul oqıǵa jeke quram úshin mańyzdy kezeń jáne bólimshe damýynyń jańa kezeńiniń sımvoly boldy.
Saltanatty sharaǵa Іshki ister mınıstriniń orynbasary — Ulttyq ulannyń Bas qolbasshysy general-maıor Ańsaǵan Baltabekov pen Aqmola oblysynyń ákimi Marat Ahmetjanov qatysty.
Saltanatty shara kazarma ǵımaratynyń janyna shyrsha otyrǵyzýdan bastaldy. Aktsııaǵa kelgen qonaqtar da qatysyp, urpaqtar sabaqtastyǵyn, dástúrdi qasterleýdi tilge tıek etti.
Oblys ákimi Marat Ahmetjanov óz sózinde bıylǵy jyl bólimshe úshin erekshe ekenin, óıtkeni onyń qurylǵanyna 30 jyl tolyp otyrǵanyn atap ótti.
— Osy jyldar ishinde bólimshe qoǵamdyq tártip pen qaýipsizdiktiń senimdi tiregine aınaldy. Sizdiń adal qyzmetińiz, kásibı sheberligińiz jáne janqııarlyǵyńyzdyń arqasynda oblys turǵyndary ózderin qaýipsiz sezinedi. Tótenshe jaǵdaılarda, órt nemese sý tasqyny kezinde de talaı ret kómekke keldińizder, — dep atap ótti ákim.
Marat Ahmetjanov kóktemgi sý tasqyny kezinde áskerılerdiń Kókshetaýdy qorǵaýǵa qosqan úlesine erekshe nazar aýdardy. 5510 bóliminiń sarbazdary Qylshaqty ózeni boıyndaǵy qorǵanys bógetin salýǵa jáne nyǵaıtýǵa atsalysty. Bul qıraýdyń aldyn alýǵa, qalany sý tasqynynan saqtap qalýǵa múmkindik berdi.
Eren eńbekteri úshin erekshe kózge túsken áskerı qyzmetkerler vedomstvolyq nagradalarmen marapattaldy. 2-shi jedel batalon komandıri Erlan Sahmedov pen onyń orynbasary Valerıı Oskolkov Rahymjan Qoshqarbaev atyndaǵy mereıtoılyq tósbelgimen marapattaldy. Jahangır Babahanov pen Abzal Mels «Qoǵamdyq tártipti qorǵaǵany úshin» tósbelgilerimen marapattaldy.
Sharadan keıin qonaqtar kazarmanyń ishin aralap, jeke qurammen áńgimelesip, áskerı qyzmetkerlerdi kásibı jetistikterimen jáne aldaǵy merekemen quttyqtady.