Respýblıka kúni qarsańynda Túrkistan oblysynyń Qaraqum aýylyna tabıǵı gaz berildi
Túrkistan oblysynyń Qaraqum aýylynda 150 oryndyq mádenıet úı ashylyp, aýylǵa tabıǵı gaz berildi, dep habarlaıdy Kazinform.
Respýblıka kúnine oraı Ordabasy aýdanyna qarasty Qaraqum aýylynda 150 oryndyq Mádenıet úıi paıdalanýǵa berildi. Jańa nysannyń ashylý saltanatyna aýdan ákimi Azat Oralbaev, oblystyq máslıhat depýtaty Ǵanı Raıymbekov, aýdandyq máslıhat tóraǵasy Baqdáýlet Jumabekov qatysyp, jańa ǵımarattyń lentasyn qıdy.
Turǵyndardyń bos ýaqytyn mádenı demalyspen ótkizýge arnalǵan jańa ǵımarattyń qurylysy ótken jyly bastalǵan bolatyn. Jalpy aýdany 429,6 sharshy metrdi quraıtyn jańa ǵımaratta horeografııa, vokal, estrada, dombyra, kórkemsóz, qolóner úıirmesi jumys isteıdi. Onda onshaqty qyzmetker eńbek etedi. Atalǵan úıirmelerge 150-ge tarta jas ónerpaz tartylmaq.
Merekelik shara barysynda qonaqtar mádenıet úıiniń aýlasyna aǵash kóshetterin otyrǵyzyp, ǵımarat ishin aralap kórip, onyń josparly jumysymen tanysty.
Sondaı-aq, Qaraqum eldi mekenine tabıǵı gaz berildi. Jalpy uzyndyǵy 24,665 shaqyrymdy quraıtyn qubyr arqyly 600-ge jýyq abonet tabıǵı gazdy tutynatyn bolady.
Saltanatty sharada aýyl aqsaqaldary, halyq qalaýlylary kógildir otynnyń alaýyn jaǵyp, aýylda gazǵa qosylǵan turǵyn úıdiń qýanyshyn bólisti.
