Respýblıka kúni qarsańynda Tarbaǵataıda medıtsınalyq nysandar ashyldy
ÓSKEMEN. KAZINFORM — Respýblıka kúni qarsańynda Shyǵys Qazaqstan oblysy Tarbaǵataı aýdandyq aýrýhanasynyń medıtsınalyq-sanıtarlyq alǵashqy kómek ortalyǵy kúrdeli jóndeýden keıin saltanatty túrde ashyldy, dep habarlaıdy ShQO ákimdiginiń baspasóz qyzmeti.
Qýanyshqa órilgen jıynǵa aýdan ákimi Darhan Shompaıuly, aýdan ákiminiń orynbasary Erjan Sovetbekuly, aýdandyq aýrýhananyń bas dárigeri, medıtsına qyzmetkerleri men aýyl turǵyndary qatysty.
Darhan Shompaıuly jınalǵan qaýymdy aıtýly oqıǵamen quttyqtap, densaýlyq saqtaý salasyn damytý, medıtsınalyq kómektiń sapasy men qoljetimdiligin arttyrý — aýdannyń áleýmettik damýyndaǵy mańyzdy baǵyttardyń biri ekenin atap ótti.
— Jóndeýden ótken ortalyqta turǵyndarǵa medıtsınalyq qyzmet kórsetýge qajetti jaǵdaılar jasalǵan. Emhana bólimshesimen qatar, balalardyń ósýi men damýyn baqylaýǵa arnalǵan Damý jáne erte aralasý ortalyǵy ashyldy. Munda pedıatr, psıholog jáne basqa da mamandar qyzmet kórsetip, balalardyń densaýlyǵyn baqylaýǵa, damý erekshelikterin erte anyqtaýǵa jáne qajetti qoldaý kórsetýge múmkindik alady, — delingen ákimdik aqparatynda.
Sondaı-aq shuǵyl jáne alǵashqy medıtsınalyq kómek kórsetý daǵdylaryn úıretýge arnalǵan arnaıy kabınetter zamanaýı qural-jabdyqtarmen qamtamasyz etildi.
Respýblıka kúni qarsańynda Tarbaǵataı aýdanynda turǵyndar úshin mańyzdy birqatar áleýmettik nysan paıdalanýǵa berilip jatyr. Medıtsınalyq-sanıtarlyq alǵashqy kómek ortalyǵymen qatar, Jańalyq aýylyndaǵy medıtsınalyq pýnkt te saltanatty túrde ashyldy.
Tarbaǵataı derbes aýdan bolǵannan beri densaýlyq saqtaý salasynda da aýqymdy jumystar atqaryldy. «Aýyldyq densaýlyq saqtaýdy jańǵyrtý» ulttyq jobasy aıasynda 9 medıtsınalyq pýnkt salynyp, paıdalanýǵa berildi. Aýdandyq aýrýhananyń juqpaly aýrýlar bólimshesi men perzenthana ǵımaraty, Quıǵan jáne Tuǵyl aýyldaryndaǵy dárigerlik ambýlatorııalar kúrdeli jóndeýden ótip, zamanaýı medıtsınalyq qural-jabdyqtarmen qamtamasyz etildi.
Sonymen qatar, Saryóleń, Sheńgildi, Jańatileý jáne Táýke aýyldaryndaǵy medıtsınalyq pýnktter de jańartyldy.
