Respýblıka kúni qarsańynda «Kitap oqıtyn ult» jobasynyń ánurany tanystyryldy
ASTANA. KAZINFORM - Respýblıka kúni qarsańynda «Kitap oqıtyn ult» jobasynyń ánurany men beınebaıany jaryq kórdi. Týyndy kitap oqý mádenıetin dáriptep, bilimniń qoǵam damýyndaǵy mańyzyn nasıhattaýǵa baǵyttalǵan.
QR Mádenıet jáne aqparat mınıstrligi baspasóz qyzmetiniń habarlaýynsha, qazaq jáne orys tilderinde jazylǵan án mátininde urpaqtar sabaqtastyǵy, bilimge umtylý men el birligi keńinen kórinis tapqan. Kitap tyń ıdeıalardyń qaınar kózi ári urpaqtardy jalǵaıtyn rýhanı qundylyq retinde sıpattalady.
Ánniń sózi men mýzykasyn «Kitap oqıtyn ult» jobasynyń Astana qalasyndaǵy keńse jetekshisi Jaqsybaı Boranbaev jazǵan. Beınebaıan Astana qalasyndaǵy Mirjaqyp Dýlatuly atyndaǵy №68 mektep-gımnazııasynyń muǵalimi Qambar Rahmetovpen birlesip ázirlendi. Án men beınebaıandy daıyndaý barysynda jasandy ıntellekt tehnologııalary qoldanyldy.
-Ánuran men beınebaıan tsıfrlyq formatta kópshilikke usynyldy. Joba halyq arasynda kitap oqýdy keńinen nasıhattap, kúndelikti kitap oqý daǵdysyn qalyptastyrýdy kózdeıdi,-delingen habarlamada.
Aıta keteıik, Aqordada ustazdardyń kásibı merekesine oraı ótken saltanatty is-sharada Memleket basshysy Qasym-Jomart Toqaev kitap oqý jastardy aqparat tasqynyna jutylyp ketýden saqtaıtyn rýhanı qalqan ekenin aıtqan bolatyn.
