Respýblıka kúni qarsańynda 50%-ǵa deıin jeńildikti marketpleıster de usynady
ASTANA. KAZINFORM- Respýblıka kúnine oraı uıymdastyrylǵan Republic Day jáne Bereke Fest respýblıkalyq aktsııalaryna Qazaqstannyń iri marketpleısteri de qosyldy, dep habarlaıdy QR saýda jáne ıntegratsııa mınıstrliginiń baspasóz qyzmeti.
Satyp alýshylar turmystyq tehnıka, elektronıka, kıim-keshek jáne basqa da azyq-túlikke jatpaıtyn taýarlardy 10%-dan 50%-ǵa deıingi jeńildikpen satyp alyp, qosymsha bonýstarǵa ıe bola alady.
Qazaqstan Respýblıkasy Saýda jáne ıntegratsııa mınıstrligi elektrondyq saýda salasynyń ókilderimen birlesip, merekelik aktsııalardy Kaspi.kz, Halyk Market, Technodom, Mechta jáne basqa da onlaın saýda alańdarynda uıymdastyrdy.
Aktsııa aıasynda turmystyq tehnıka, elektronıka, kıim-keshek, aıaq kıim, úıge qajetti zattar, keńse taýarlary jáne basqa da azyq-túlikke jatpaıtyn taýarlarǵa arnaıy usynystar qarastyrylǵan. Jeńildikterdiń mólsheri men bonýs alý sharttary saýda alańyna, satýshyǵa jáne tańdalǵan taýarǵa baılanysty.
Onlaın saýdanyń basty artyqshylyǵy — elimizdiń kez kelgen óńirindegi turǵyndar merekelik usynystardy paıdalana alady. Satyp alýshylar dúkenge barmaı-aq taýarlardy qarap, baǵalaryn salystyryp, ózine qajetti ónimdi tańdaı alady.
Kásipkerler úshin mundaı aktsııalarǵa qatysý jańa tutynýshylardy tartýǵa, satylym kólemin arttyrýǵa jáne óz ónimderin kópshilikke tanystyrýǵa qosymsha múmkindik beredi.
-Aktsııalar aıasynda qazaqstandyqtar marketpleısterden jıi satyp alatyn taýarlardyń eń tanymal bes sanaty anyqtalǵan. Olardyń qataryna turmystyq tehnıka men elektronıka, úıge qajetti zattar, kıim-keshek pen aıaq kıim, balalarǵa arnalǵan taýarlar jáne kúndelikti turmysqa qajetti zattar kiredi. Bul sanattarda smartfondar, turmystyq tehnıka, ydys-aıaq, úı toqyma buıymdary, oıynshyqtar, sharýashylyq jáne keńse taýarlary bar,-delingen habarlamada.
Osylaısha, Republic Day jáne Bereke Fest aktsııalary saýda ortalyqtary men saýda jelilerin ǵana emes, onlaın saýda alańdaryn da qamtyp, qazaqstandyqtarǵa merekelik usynystardy paıdalanýǵa qosymsha múmkindik berip otyr.
Eske salaıyq, Republic Day jáne Bereke Fest respýblıkalyq aktsııalary 2026 jylǵy 17–27 qazan aralyǵynda ótedi. Osy kezeńde elimizdiń saýda ortalyqtarynda, saýda jelilerinde jáne marketpleısterinde arnaıy usynystar qarastyrylǵan.
Osyǵan deıin Respýblıka kúnine oraı saýda nysandary 50%-ǵa deıin jeńildik usynatyny týraly azdyq.
