Respýblıka kúni qarsańynda 16 jas ǵalym baspanaly boldy
ASTANA. KAZINFORM - Búgin Respýblıka kúnine arnalǵan merekelik is-sharada QR Ǵylym jáne joǵary bilim mınıstri Saıasat Nurbek Memleket basshysynyń tapsyrmasyn oryndaý aıasynda 16 jas ǵalymǵa páter sertıfıkattaryn saltanatty túrde tabystady.
Іs-sharanyń ashylýynda mınıstr qatysýshylardy Respýblıka kúnimen quttyqtap, Memleket basshysynyń tapsyrmasyna sáıkes elimizdiń ǵylym jáne joǵary bilim júıesinde júzege asyrylyp jatqan mańyzdy bastamalarǵa toqtaldy.
-Qazirgi tańda Qazaqstannyń ǵylymy men joǵary bilim júıesi qarqyndy damyp, álemdik standarttarǵa jaqyndap keledi. Akademııalyq derbestik ýnıversıtetterge óz baǵytyn aıqyndaýǵa jáne jańashyl jobalardy iske asyrýǵa jol ashty. Prezıdent tapsyrmasyna sáıkes elimiz óńirlik akademııalyq ortalyq retinde óz pozıtsııasyn nyǵaıtyp keledi, – dedi mınıstr.
Mınıstr óz sózinde jas ǵalymdardyń ómir sapasy men áleýmettik ál-aýqaty Memleket basshysynyń erekshe nazarynda ekenin atap ótti. Sondaı-aq Respýblıka kúni qarsańynda Prezıdent Jarlyǵymen birqatar ǵalymdar men ǵylym qyzmetkerleri memlekettik nagradalarmen marapattalǵanyn atap ótti.
-Ǵylym tek ıdeıa men izdenisten ǵana turmaıdy, ol turaqty qoldaý men qolaıly jaǵdaıdy da qajet etedi. Búgin Ulttyq mereke qarsańynda 16 jas ǵalymǵa páter kiltteri tabystalyp jatyr. Bul – memleketimizdiń jas zertteýshilerge kórsetip otyrǵan júıeli qoldaýynyń jáne ǵylym salasyn damytýǵa degen berik ustanymynyń aıqyn kórinisi. Sondaı-aq búgin Prezıdent Qazaqstan Respýblıkasynyń ál-Farabı atyndaǵy ǵylym men tehnıka, A.Baıtursynuly atyndaǵy gýmanıtarlyq ǵylymdar salasyndaǵy 2025 jylǵy memlekettik syılyqtaryn berý týraly Jarlyqqa qol qoıdy. Otandyq ǵylymnyń damýyna serpin berip júrgen kórnekti tulǵalardyń eńbegi laıyqty baǵalanyp, olardyń jetistigi jas býynǵa ónege, el abyroıynyń aıǵaǵyna aınaldy, – dedi Saıasat Nurbek.
Prezıdenttiń 2024 jylǵy 31 mamyrda Ǵylym ordasynda jas ǵalymdarmen kezdesýinde bergen tapsyrmasyn oryndaý maqsatynda ǵalymdardyń áleýmettik mártebesin kóterý jáne qoldaý kórsetý, sondaı-aq ǵylymǵa jas kadrlardyń kelýin yntalandyrý úshin Komıssııa Almaty qalasynda baspana berý úshin ǵylymı uıymdar men joǵary jáne joǵary oqý ornynan keıingi bilim berý uıymdarynyń jas ǵalymdarynyń kezekti tizimin aıqyndady.
QR Ǵylym jáne joǵary bilim mınıstrligi 2024 jylǵy mamyr aıynan bastap baspanaǵa muqtaj jas ǵalymdardyń (40 jasqa deıin qosa alǵanda) tizimin qalyptastyrý boıynsha jumys júrgizip keledi. Mınıstrlik bul jumysty kezeń-kezeńimen júzege asyryp keledi. Negizgi maqsat – jas ǵalymdarǵa qolaıly áleýmettik jaǵdaı jasaý arqyly olardyń ǵylymı áleýetin arttyrý jáne ǵylymmen turaqty aınalysýǵa yntalandyrý. Jas ǵalymdar sanynyń artýy eldegi ǵylymı-zertteý qyzmetiniń sapasy men tıimdiligin kóterip, ınnovatsııalyq ıdeıalar men jańa tehnologııalardyń damýyna serpin beredi. Bul óz kezeginde Qazaqstannyń ǵylym men joǵary bilim salasyndaǵy básekege qabilettiligin arttyrýǵa yqpal etedi.
Sonymen qatar 2023 jylǵy 19 qazanda QR Ǵylym jáne joǵary bilim mınıstrligi men «Otbasy bank» AQ arasynda jas ǵalymdarǵa 2023-2027 jyldarǵa arnalǵan jeńildetilgen kredıt berý baǵdarlamasy boıynsha yntymaqtastyq týraly kelisimge qol qoıdy. Qazirgi ýaqytta atalǵan baǵdarlama boıynsha 482 jas ǵalym jeńildikpen baspana aldy.
Osyǵan deıin Respýblıka kúni qarsańynda Qaraǵandy oblysynyń kómir óndirý salasynda eńbek etip júrgen birqatar qyzmetker eńbegi elenip, joǵary memlekettik nagradalarǵa ıe bolǵany týraly jazdyq.