Respýblıka kúni — halqymyzdyń rýhyn kóterip, birligimizdi bekemdeıtin mereke — senator

ASTANA. KAZINFORM — Konstıtýtsııalyq zańnama, sot júıesi jáne quqyq qorǵaý organdary komıtetinde «Respýblıka kúni: egemendi jáne quqyqtyq memleket qurýdaǵy tarıhı-quqyqtyq mańyzy» taqyrybyndaǵy dóńgelek ústel otyrysy ótti. 

— 2022 jylǵy 16 maýsymda Memleket basshysy Qasym-Jomart Kemeluly Toqaev Ulttyq quryltaıda Respýblıka kúnine Ulttyq mereke mártebesin qaıtarýdy usynyp, al qyrkúıekte bul bastama zańnamalyq deńgeıde bekitildi. Prezıdenttiń tarıhı sheshiminiń negizinde Respýblıka kúni Ulttyq mereke mártebesin alyp, eldiń egemendigi men memlekettiliginiń aıqyn sımvolyna aınaldy. El Prezıdenti atap ótkendeı, Respýblıka kúni — egemendiktiń jáne Ádiletti Qazaqstan qurý jolyndaǵy birligimizdiń sımvoly, — dedi senator Nurlan Beknazarov.

Onyń aıtýynsha, Konstıtýtsııalyq zańnama, sot júıesi jáne quqyq qorǵaý organdary komıteti óz qyzmeti aıasynda elimizdiń konstıtýtsııalyq qurylysynyń turaqtylyǵyn qamtamasyz etýge, zań ústemdigin ornyqtyrýǵa, azamattardyń quqyqtary men bostandyqtaryn qorǵaýǵa baǵyttalǵan zańnamalyq jumysty júıeli túrde júrgizip keledi.

Osy turǵydan alǵanda, Respýblıka kúnin tarıhı-quqyqtyq turǵyda zerdeleý tek merekelik shara ǵana emes, quqyqtyq memleket pen demokratııalyq ınstıtýttardy nyǵaıtýdyń mańyzdy tetigi bolyp sanalady. Deklaratsııada bekitilgen egemendik, aýmaqtyq tutastyq, zań ústemdigi men ulttyq biregeılik qaǵıdattary búgin de ózektiligin joǵaltqan joq jáne zamanaýı memlekettik saıasattyń quqyqtyq ózegine aınaldy. Respýblıka kúni — halqymyzdyń rýhyn kóterip, eldigimizdi nyǵaıtatyn, birligimizdi bekemdeıtin mereke, — dedi ol.

Aıta ketelik Respýblıka kúni Astanada qandaı sharalar ótetini týraly jazǵan edik.