Respýblıka kúni: Aqmolanyń orman sharýashylyqtaryna 85 jańa tehnıka tabystaldy
KÓKShETAÝ. KAZINFORM — Aqmola oblysyndaǵy 13 orman sharýashylyǵy mekemesi jalpy quny 3 mlrd teńgeden asatyn 24 órt sóndirý kóligin, 31 shaǵyn orman patrýldik kóligin, 30 traktor aldy, dep habarlaıdy Kazinform tilshisi.
Respýblıka kúni qarsańynda jáne Orman sharýashylyǵy qyzmetkerleriniń kúnine oraı sala ókilderi órtti sóndirý, órt oshaqtaryn jyrtý jáne profılaktıkalyq is-sharalardy júrgizý úshin arnaıy jabdyqtalǵan jańa mamandandyrylǵan tehnıka aldy.
Aqmola oblysynyń ákimi Marat Ahmetjanov orman sharýashylyǵy qyzmetkerlerine kólikterdiń kiltin jáne memlekettik nagradalardy tabys etti.
— Bizdiń ólkeniń tabıǵaty erekshe jáne janýarlar dúnıesine baı. Bul dana halqymyz urpaqtan-urpaqqa uqyptylyqpen mura etip qaldyrǵan elimiz úshin baǵa jetpes baılyq. Árqaısyńyz — adam men tabıǵat aldyndaǵy boryshtaryńyzdy abyroımen atqaryp kele jatqan óz isińizdiń kásibı mamanysyz. Tabıǵatty qorǵaý salasyn saqtaý jáne damytý maqsatynda orman sharýashylyǵy bazasy jyl saıyn jańartylyp otyr. Sońǵy jyldary aýa raıynyń qıyn jaǵdaıyna qaramastan iri órtti boldyrmaı, jalyn oshaqtaryn erte kezeńde jedel joıyp kelemiz, — dep atap ótti aımaq basshysy.
Shara barysynda salaǵa eleýli úles qosqan 10 qyzmetker «Eńbek sińirgen orman ósirýshi» jáne «Qazaqstan ormanyn qorǵaýdaǵy minsiz qyzmeti úshin» tósbelgilerimen marapattaldy.
Aqkól aýdany Keńes orman sharýashylyǵy mekemesiniń dırektory Janat Qojahmetov jańa tehnıkanyń kiltin jáne «Qazaqstan ormanyn qorǵaýdaǵy minsiz qyzmeti úshin» II dárejeli medalin aldy. Tabıǵı baılyqty saqtaý — onyń otbasynyń basty isi: ákesi men baýyrlary da Otradnoe orman sharýashylyǵynda eńbek etedi. Otbasynyń jalpy eńbek ótili 85 jyldy quraıdy.
— Sońǵy jyldary memleket orman sharýashylyǵyn damytýǵa úlken kóńil bólip otyr. Bul bizge zor jiger beredi. Jańa tehnıka órtti tez anyqtaýǵa jáne erte kezeńde aýyzdyqtaýǵa, sonymen qatar aýmaqty patrýldeýge múmkindik beredi. Bizdiń aýmaq dalamen shektesip otyr, sondyqtan bul tehnıka órtti bastapqy kezeńde sóndirýge kómektesedi, — dep atap ótti Janat Qojahmetov.
Іs-shara barysynda sondaı-aq orman órtterin erte anyqtaý júıesiniń jumysy kórsetildi. Bul júıe qazirgi ýaqytta bes orman sharýashylyǵy mekemesinde — Aqkól, Buqpa, Keńes, Krasnobor jáne Kýıbyshev orman sharýashylyqtarynda iske qosylǵan.
— Qazir tsıfrlandyrý men jasandy ıntellektti engizý boıynsha qarqyndy jumys júrgizilip keledi. Orman sharýashylyǵy salasy da betalystan qalyspaı otyr, bes orman sharýashylyǵy mekemesinde aldyn ala eskertý júıesi engizilip otyr. Aımaqtaǵy orman qorynyń jartysynan astamyn biz qamtyp otyrmyz. Sońǵy jyldary bizde úlken orman órtteri bolǵan joq. Erte anyqtaý júıesi — bul ýaqyt óte kele tuman men tútindi ajyrata bastaıtyn ózdiginen bilim alatyn baǵdarlama. Nemese pesh tútini men orman tútinin ajyrata alady. Bul — munaralarǵa ornatylǵan aqyldy kameralar. Búginde oblysta 20 shaqyrymǵa deıin radıýsta jumys isteıtin 20 kamera ornatylǵan. Bul júıe bastapqyda Býrabaı ulttyq saıabaǵynda synaqtan ótti, — dep atap ótti Aqmola oblysy Tabıǵı resýrstar jáne tabıǵatty paıdalanýdy retteý basqarmasynyń basshysy Djanet Mıkıshev.
Spıker Abaı aýdanyndaǵy oqıǵalardan keıin Memleket basshysynyń tapsyrmasyna sáıkes orman sharýashylyǵy mekemelerin jabdyqtaýǵa erekshe kóńil bólingenin qosyp ótti. Buryn orman sharýashylyǵy mekemeleri tehnıkamen tolyq jabdyqtalmaǵan bolsa, búginde park tolyǵymen jańartyldy.
Budan basqa, qatysýshylarǵa «Buqpa» orman sharýashylyǵy mekemesindegi» zamanaýı orman órt sóndirý stantsııasynyń jumysy tanystyryldy. Onyń ereksheligi — bul ekinshi deńgeıli orman patrýldik órt sóndirý stantsııasy jyl boıy jumys isteı alady, qysta jaqyn mańdaǵy eldi mekenderde órtti sóndirýge kómektesedi.