Respýblıka qaharmandary: Túrkistan oblysynda 18 jetim balany baýyryna basqan Ana turady

TÚRKІSTAN. QazAqparat - Kentaý qalasynyń turǵyny Túımegúl Ergeshqyzyn kópshilik altyn júrekti Ana dep biledi. Ol ata-anasynan erte aırylǵan 18 balany asyrap alyp, qamqorlyq tanytyp otyr. «QazAqparat» HAA Respýblıka kúni merekesi qarsańynda «Respýblıka qaharmandary» atty joba ashyp, maqalalar serııasyn jarııalaı bastaǵan. Bútkil elge aty tanylmasa da óziniń belsendi ómirlik ustanymymen qalyń kópshilikke úlgi bolǵan búgingi qaharmanymyz - Túımegúl Ergeshqyzy.

Túımegúl Ergeshqyzy 10 qyz ben 8 uldy qamqorlyqqa alǵan. Olardyń ulttary da ártúrli. Atap aıtar bolsaq, bireýi orys, bireýi ózbek, endi biri káris ultynan. Qalǵandary qazaqtyń qarakózderi. Bir shańyraq astynda tatý-tátti turyp jatqan ár ult ókiliniń balalaryn kórgende Túımegúl apaıdyń úıi «shaǵyn assambleıa» ispetti kórinedi.

«Ómirimniń mánisi - ózgege jaqsylyq jasaý» - dep biletin qamqor jannyń basty maqsaty – búldirshinderin qatarynan kem qylmaı ósirý, úlken azamat etip tárbıeleý.

«Ómir osynysymen mańyzdy, maǵynaly. Ózim balajanmyn. Jetim balalardyń bireýdiń qolyna jáýteńdep, qarap júrgenin kórgende júregim aýyrady. Shydaı almaımyn. Sondyqtan bala asyrap alamyn degen sheshimge keldim. Maǵan balalar ártúrli jaǵdaıda keldi. Birin dúnıege kele salysymen qolyma alsam, endi birin 1,5 jasynda, bireýin es biler eresek shaǵynda qamqorlyǵyma aldym», – deıdi Túımegúl Ergeshqyzy.

Turǵyn úıde balalardyń jattyǵý jasaýyna, sabaq oqýyna, bos ýaqyttaryn tıimdi ótkizýine, demalýyna arnalǵan arnaıy bólmeler bar. Qajetti jıhazdarmen jabdyqtalyp, kórnekiliktermen qamtamasyz etilgen. Aýlada búldirshinder úshin oıyn quryldary ornatylǵan. ıAǵnı, árbir balanyń qalypty azamat bolyp ósýine barlyq jaǵdaı jasalǵan.

«Balalar úıine barsam júregim aýyrady. Barlyq balalardy asyrap alǵym kelip turady», – deıdi qamqor jan.

Búginde Túımegúl Ergeshqyzy uldyń úlkeni Qaısardy úılendirip, enshisin berdi. Al, boıjetken eki qyzyn toı jasap uzatty. Sondaı-aq, eki qyzy stýdent bolsa, bir uly áskerde Otan aldyndaǵy boryshyn ótep jatyr. Qalǵan 4 jetkinshek mektepte oqyp júr. Al, 4 jasar Aıbarys balabaqshaǵa barady. Nurqanat esimdi uly qarashańyraqqa bas bolyp otyr. Ázirge, ul-qyzdarynan 7 nemere súıdi.

«Uldarymnyń barlyǵyn súndetke otyrǵyzyp, toı jasap berdim. Qazir kúndelikti tirshilikte qolǵabys etýde. Barshasy boıjetip, erjetip úlken ómirge qadam basyp jatyr. Olar da bir-birine baýyrmal. Nemerelerim de ósip keledi. Solardyń tátti qylyǵyn tamashalap júrip, kúnniń qalaı ótkeninde bilmeı qalamyn»-deıdi ol.

Túımegúl Ergeshqyzynyń ózi de kópbalaly otbasynda ósken. Sondyqtan baýyrdyń, aǵa-ápkeni qadirin jaqsy biledi. Balalaryna da bul turǵyda keń kólemdi túsinik berip, baýyrmaldyq qasıetti qalyptastyryp qoıǵan. Qazir barshasyda úlkenge izitpen, kishige qurmetpen qaraıdy. Bir biriniń sabaqtaryn qadaǵalap, úı tapsyrmalaryn birge oryndaıdy. Odan bólek, esik aldyndaǵy jumystardy birge atqarady. Otbasylyq kásipke bas kóz bolyp, analaryna kómektesedi.

«Biz ákemizden erte aıryldyq. Úıdiń úlkeni bolǵandyqtan, sińlilerim men inilerime qamqor bolyp, anama qolǵabys ettim. Bári bilim aldy, ósip-óndi, qazir ózderiniń otbasy bar. Keıin bul ıgi isimdi jalǵastyrýdy oıladym» - deıdi qamqor jan.

Jalpy altyn júrekti ana bala asyrap alýdy 33 jasynda bastaǵan. Alǵashqy qyzyn qolǵa alǵan sátinde úlken áserge bólenipti. Sodan jyl saıyn otbasy músheleri kóbeıe túsken. Іlgeride balalarǵa qaraý, jetildirý qıyndyq týdyrǵanymen, keıin qalyptasyp ketken. Degenmen, ol «18 balany qamqorlyqqa alamyn dep oılamaǵanmyn» - deıdi.

«Barlyǵy Allanyń qalaýymen boldy. Men baqyttymyn. Men balalarymmen baqyttymyn» - deıdi altyn júrekti ana.