Respýblıka qaharmandary: Paralımpıada júldegeri sportta múmkindik shektelmeıtinin aıtady
Ánýar Sarıev 1992 jylǵy 4 aqpanda Atyraý qalasynda dúnıege kelgen. Bala kezinen sportqa ańsary aýǵan. Mektepte de dene shynyqtyrý sabaǵyn jaqsy kóripti.
«Dzıýdo – sporttyń eń qıyn túri. Bes mınýttyq beldesý kezinde bir sekýndqa ǵana qatelik jiberseń, opyq jep qalasyń. Halyqaralyq saıystarǵa barǵanda, ózimniń emes, aldymen eldiń abyroıyn oılaımyn. Óıtkeni, jeńiske jetseń, eldiń kók baıraǵy kóterilip, Ánurany shyrqalady. Sol kezde elińe, Otanyńa degen qurmetiń arta túsedi. Alaıda, qazaqtyń «Baq shaba ma, bap shaba ma?» degenindeı, sportta únemi jeńistiń bıik tuǵyryna jetý múmkin emes. Birde jeńiske jetip, mereılenip turasyń, al, keıde jeńilistiń kermek dámin tatýǵa týra keledi. Jeńilgen sátte ózińnen úmit kútken bapkerińdi, barsha jankúıerińdi, elińdi uıatqa qaldyrdym-aý degen oıǵa berilesiń. Árıne, jeńis te, jeńilis te kóńil-kúıge áser etedi», -deıdi Tokıo Paralımpıadasynyń kúmis júldegeri Ánýar Sarıev.
Paradzıýdoshy H.Dosmuhamedov atyndaǵy Atyraý ýnıversıtetiniń dene shynyqtyrý fakýltetin bitirgen. Dzıýdomen bala kezinen aınalysady. Buryn Qazaqstan qurama komandasynyń sapynda jattyqqan.
«Dzıýdodan el quramasynyń sapynda túrli oqý-jattyǵý jıyndaryna qatystym. Sol kezde Eldos Smetov, Aıbek Imashevpen birge jattyqqan edim. Aıbek ekeýmiz týrnırlerde birge kúresip, bir-birimizge básekeles bolyp júretinbiz», -dep eske alady paradzıýdoshy.
Alaıda, ómirdiń óz aǵymy bar. Jol apatyna túsken Ánýar Sarıev kózinen jaraqat alyp, bastapqyda dzıýdodan qol úzýine týra keldi. Biraq, taǵdyrdyń synaǵyna moıymaǵan ol sportty tastamaýdy jón kórdi.
«Kólik apatynan keıin kóz janaryma zaqym kelip, kórý múmkindigim nasharlaǵany ras. Alaıda, meniń múmkindigim shektelgen joq ǵoı. Kerisinshe, ómir súrýge, jetistikke jetýge qulshynysym arta tústi. Sol sebepten, ózimniń úırenshikti sportymdy tastaǵym kelmedi. Budan bylaı paradzıýdomen aınalysyp, elimniń abyroıyn asqaqtata beremin degen sheshim qabyldadym», -deıdi Ánýar Sarıev.
Onyń baǵy bar eken. Paradzıýdony damytýdy bilikti bapker Jandos Qııanov qolǵa aldy. Ánýar Sarıevty óz baýyryndaı janyna tartty. Bapkerlik keńesin berip, aǵalyq aqylyn aıtty. Jigerin janyp, halyqaralyq dodalarǵa jetelep apardy.
«Bala kezimnen sportty, onyń ishinde dzıýdony tańdadym. Sportshy bolǵan soń, elimizdiń kók baıraǵyn halyqaralyq dodalarda bıikte jelbiretip, Ánuranyn shyrqatýdy armandaýshy edim. Sol armanymdy oryndaý úshin áli de jattyǵyp júrmin», -dep áńgimeledi ol.
Ánýar Sarıev – paradzıýdodan paralımpıada lıtsenzııasyn ıelengen alǵashqy qazaqstandyq sportshy. Árıne, bul úshin jattyǵýlarda ter tókti. Birneshe halyqaralyq dodalarda baq synady. Sondaı saıystyń biri – 2015 jyly Koreıanyń Seýl qalasynda ótken múmkindigi shekteýli sportshylardyń búkilálemdik oıyndary. Bul saıysta 60 kelide beldesken paradzıýdoshy qola medaldy ıelenip, Rıo-de-Janeıro paralımpıadasynyń lıtsenzııasyna qol jetkizdi.
«Bul – alǵash ret qatysqan paralımpıada. Basqa saıystarǵa qaraǵanda, paralımpıadanyń jóni bólek. Sondyqtan, ár sportshyda qobaljý bolatynyn jasyrmaımyn. Dúbirli dodanyń shırek fınalynda ázerbaıjandyq sportshy Ramın Ibragımovke ese jiberip aldym. Al, jubanysh beldesýinde argentınalyq Edýardo Gaýtony utyp, qola medal ıelenýge bir qadam jaqyndaı tústim. Biraq, qola medal úshin tartysta Ýrýgvaı sportshysy Henrı Borhestiń joly boldy. Sóıtip, alǵashqy paralımpıadada el qorjynyna júlde sala almadym», -deıdi Ánýar Sarıev.
Alaıda, bul sátsizdik qaısar sportshyny muqalta qoıǵan joq. Sharbolattaı shıryqqan paradzıýdoshy jeke bapkeri Jandos Qııanovtyń keńesin buljytpaı oryndap, jattyǵýǵa bel sheshe kiristi. Maqsaty – Tokıo paralımpıadasynan júlde alý.
«Tokıo paralımpıadasynda 60 kelidegi meniń salmaǵymda 12 sportshy synǵa tústi. Bári de – óz eliniń myqty sportshylary. Sál qatelikke boı aldyrsań, qapyda qaldyrady. Onyń ishinde sheberligi shyńdalǵan paradzıýdoshylar da bar. Ásirese, maǵan fınaldyq saıys qıynǵa soqty. Sebebi, fınalda Ázerbaıjan Respýblıkasynyń ókili Výgar Shırınlımen kezdestim. Ol 2017 jylǵa deıin densaýlyǵynda kináraty joq sportshylar arasynda jarystarǵa qatysyp, bes úzdik dzıýdoshynyń qataryna kirgen. Aqtyq synda qarsylasym bazarı upaıyn enshiledi. Maǵan namysqa tyrysý qajet boldy. Sóıtip, onyń osal tusyn taýyp, bazarıǵa qol jetkizdim. Budan soń eki ret ádis qoldanbaq boldym. Biraq, sátti shyqpady. Bastapqyda qolym ustaǵan jerinen sýsyp ketti. Keleside Shırınlı aılaly ádisimdi oryndaýǵa múmkindik bermedi. Sál bosańsyǵan sátte qarsylastyń ádisine túsip, ýysta turǵan altyn medaldy enshileı almadym», -deıdi Tokıo paralımpıadasynyń kúmis júldegeri Ánýar Sarıev.
Endi ol Parıjde ótetin paralımpıadanyń lıtsenzııasyn ıelenýdi kózdep otyr.
«Meniń bir armanym bar. Bul – Paralımpıadada elimizdiń Ánuranyn shyrqatyp, kók baıraqty jelbiretý», -dep aldaǵy maqsatymen bólisti paradzıýdoshy.
