Respýblıka qaharmandary: Muǵalimin qımaı Astanadan alystaǵy aýylǵa kóship barǵan shákirt oqıǵasy
Shákirtin rýhanı turǵyda damytqan
Álisher Saǵyntaev 2019 jyly Astana qalasyndaǵy «Smart Bilim» qosymsha bilim berý ortalyǵynda matematıkadan sabaq berip júrgen. Oǵan 6-synypta oqıtyn Erasyl shákirt bolyp keledi. Jetkinshek Nazarbaev zııatkerlik mektebine túsý úshin matematıka pánin tereńdetip oqýǵa nıettengen. Ustazy aptasyna 3 ret bir jarym saǵattan bilim beredi. «Erasyldyń úıretkenimdi lezde qaǵyp áketetin zor talabyn baıqadym. Іni-aǵa retinde aralasyp kettik. Oǵan tek matematıkany emes, tulǵa retinde ózińdi damytýdyń qyr-syrlaryn aıta bastadym», - deıdi Álisher Saǵyntaev.
2020 jyldyń jazynda pedagogqa Shyǵys Qazaqstan oblysyndaǵy aýyl mektebine jumysqa barýǵa usynys túsken. Oılanbastan kelisim bergen ol áıeli, eki balasymen Samar aýdany Qulynjon aýylyna kelgen.
Erasyl matematıka pániniń qyr-syryn bilýine ǵana emes, rýhanı turǵyda ósýine kóp septigin tıgizgen muǵalimin qımaǵanyn aıtty.
«Tálimgerim sabaqtan tys ýaqytta da qasyna tartyp, aqylyn aıtatyn. Onyń basqa óńirge ketkenin estigende qatty qapalandym. Meniń de sol mektepke barǵym keletinin aıttym. Ustazym da kelise ketti. Mektep dırektorynyń ata-anam qarsy bolmasa qýana qabyldaıtynyn bildirdi. Biraq áke-sheshemdi kóndirý qıynǵa soqty. Áıteýir kelisken soń, qujattardy jınastyryp, aýylǵa jol tarttym. Osynda kelgen sebebim – Álisher aǵanyń qasynda júrsem ózimdi tulǵa retinde qalyptastyryp, kózdegen maqsatyma jetetindigime senimim kámil», – deıdi 15 jastaǵy Erasyl Erlanuly.
Sóıtip, 8 synyptyń tórtinshi toqsanynda Erasyl Qulynjon aýylyndaǵy Ybyraı Altynsarın atyndaǵy mektepke tústi.
Anasy ony ustazyna óz qolymen ákelip tapsyrdy. Oqýshy qazir aýylda bilim alyp, mekteptiń ekinshi qabatyndaǵy jataqhanada turyp jatyr. Elordadan kelgen muǵalimderdiń barlyǵy da sol jerde turady eken. «Áke-sheshemdi, dostarymdy saǵynamyn, árıne. Bir apaıym bar. Biraq osynda kelgenime esh ókinip kórgen emespin. Keleshekte ınjener bolǵym keledi», - deıdi oqýshy. Ustazy da aýylǵa kóshkenine ókinbeıtinin aıtty. Ózi týyp-ósken Astananyń qym-qýyt tirshiliginen, aýyldyń tynyshtyǵyn unatatynyn jetkizdi.
«Aıtqanynan qaıtpaıtynyn sezdim»
Erasyldyń anasyn da áńgimege tartyp kórdik. Ol bizge baýyr eti balasyn alystaǵy aýylǵa jibergende qandaı sezimde bolǵanyn aıtyp berdi. «Ulym qosymsha bilim berý ortalyǵyna baryp matematıkany tereńirek oqyp júrdi. Sol jerde Álisher Saǵyntaevtan bilim aldy. Balama ustazdyń sabaqty túsindirý ádisi unady. Bir kúni Erasyldy keshkilik sabaqtan alyp ketýge baryp tursam, Álisher myrza qasyma kelip, menen «Erasylǵa tárbıe berýdegi ádisińiz qandaı?» dep surady. Men oǵan eń aldymen qashanda balamnyń sózin bólmeı, pikirin, oıyn muqııat tyńdaıtynymdy, adamgershilik pen adaldyqty árkez bıik usta dep aıtyp otyratynymdy jetkizdim», - deıdi Nazgúl Mýsına.
Onyń aıtýynsha, Erasyl tabıǵatynan elgezek, sabyrly, tııanaqty. Úlkendi syılap turady. «Bir kúni kóshede kórip qalǵan apanyń sómkesin kóterip, úıine deıin aparyp tastapty. Marqum atasyna degen qurmeti erekshe edi. Ákem de ony óte jaqsy kórip, árdaıym aqylyn aıtyp otyratyn, kitap oqytqyzatyn. Osylaısha, Erasyl kishkentaıynan ata ónegesin kórip ósken. Baıqaǵanymdaı, aýylda ashylǵan ortalyqtyń maqsaty - balalarǵa sabaq oqytyp qana qoımaı, ómir jolynda durys baǵyt berý. Óıtkeni olar oqýshylarmen ǵana emes, bizben de baılanysta bolatyn. Tipti balalarmen birge motıvatsııalyq fılm kórýge shaqyratyn. Sol jerde olardyń komandasynyń arasyndaǵy birlikti, izdenimpazdyqty kórdim. Zamanaýı ustanymdary bar, qazaqtyń jalyndaǵan jastary ekenin túsindim. Іsterine adal ustazdarǵa jalǵyz ulym, kózimniń qarashyǵyn sol kezden bastap senip tapsyrǵan edim», - deıdi oqýshynyń anasy.
Erasyl Nazarbaev zııatkerlik mektebi testiniń qorytyndysy boıynsha 1089 ball alǵan. Balasy bilim ordasyna túse almasa da osyndaı nátıjesi úshin anasy qatty qýanǵan.
«Ulym Álisher ustazymen aralasýyn toqtatpady. Qoly bosasa onyń keńsesine bet alatyn. Men de qarsy bolmadym, Bos júrgenshe, bilim alsyn dedim. Tipti úıine de baryp turatyn. Olar shákirt pen ustaz, aǵa men baýyr bolyp syılasty. Erasyl «Aýylǵa baryp oqımyn» degende qarsy ekenimdi bildirsem de, ishteı onyń bul aıtqanynan qaıtpaıtynyn jaqsy túsindim. «Bir toqsan oqyp kel, sosyn ózińniń №89 mektebińe qaıta túsesiń» dep kelistim. Biraq jazǵy kanıkýlǵa kelgende ol birden 9 synypty da sonda oqımyn dep sheshkenin aıtty. Balamnyń eseıip, óz pikiri qalyptasqanyn ańǵardym da óz kelisimimdi berdim. Ustazynyń qasynda júrse týra joldan taımas dep senemin. Ómirde ár túrli jaǵdaı bolyp jatady ǵoı. Ózim kúni boıy jumystamyn», - deıdi áıel.
Búginde ol QR Bas prokýratýrasynda qyzmet etedi. Keıde Erasyldyń elordada júrgende mektepten tys ýaqytta qaıda bolatynyn, ne istep júrgenin bilmeı qalatyndyqtan ana retinde ishteı alańdaǵanyn jetkizdi.
«Teris jolǵa túsip, temeki shegip, kóshe kezip, ne kompıýterlik oıyndarǵa táýeldi bolǵannan góri balamnyń bilimge umtylǵany qýantady. Erasyldy Qulynjon aýylyna ózim aparyp keldim. Alys jer eken. Іshteı júregim aýyrsa da bildirtpeýge tyrystym... Eger onyń oqýǵa degen nıetin quptamaı, betin qaqsam, boıyndaǵy ózine degen senimdilikti joǵaltyp ala ma dep qoryqtym. Alysqa kóp jibermegendikten bolar, tipti qasynda qalsam ba degen oı kelgen. Ana degen balasyn birneshe saǵat kórmese de saǵynady ǵoı. Árıne, qatty saǵynamyn. Kúnde habarlasyp turamyz. Keıde kúnine birneshe ret sóılesemiz. Erasylymdy birinshi Allaǵa, ekinshi Álisher ustazyna tapsyrdym. Jalpy sol jerdegi barlyq ustazdarǵa senemin. Balama kóz qyrlaryn salyp, baýyrlary sııaqty qamqor bolatyny esh shúbá keltirmeımin», - deıdi Nazgúl Mýsına.
«Bolashaqta bıik belesterdi baǵyndyrady»
Álisher Saǵyntaev shákirtiniń talaby taýdaı ekendigin, onyń kelesheginen zor úmit kútetinin jetkizdi. «Erasyldyń boıynda jaqsy qabiletter kóp. Osy qabiletterin damyta, asha túsýge tyrysyp júrmiz. Onyń biri – kóshbasshylyq. Synyptastaryn, qatarlastaryn biriktirip, ortaq múddege tarta alady. Kez kelgen adammen til tabysyp ketedi. Basqaǵa únemi kómegin aıamaıdy. Demalystarda synyptastaryna matematıkany úıretip júrgenin de kórdim. Óz-ózin damytyp, izdenýden sharshamaıdy. Moınyna artylǵan jaýapkershilikti sezinip, ár iske tyńǵylyqty qaraıdy. Bolashaqta bıik belesterdi baǵyndyryp, elge qyzmet etetin, jurttyń qamyn oılaıtyn myqty azamat bolyp shyǵady dep senemin», - deıdi pedagog.
Oqýshysynyń Astanaǵa qaıtqysy keletinin aıtqan kezderi bolmapty. Kerisinshe, osynda júrgenine qýanady eken.
«Aýylda kóńili túsip, qulazyp júrgenin kórgen emespin. Tipti jazda kanıkýlǵa ketkende maǵan habarlasyp, «Tezirek sabaq bastalsa ǵoı» deıdi. Men árkez oqýshylarymnyń baqytty bolǵanyn qalaımyn. Eger aldaǵy ýaqytta qaıtqysy kelse, árıne jiberýge daıynmyn», - deıdi Álisher Saǵyntaev.
