Respýblıka qaharmandary: «qazaqstandyq Nık Výıchıch» júzýden chempıon bolsam dep armandaıdy

ASTANA. QazAqparat – Shydamdylyqtyń, ómirge degen mahabbattyń sımvoly dese, qazaqstandyqtardyń kóbisi oılanbastan Álı Turǵanbekovti aıtar edi. Eki aıaqsyz dúnıege kelgen Álı Turǵanbekovtiń taǵdyry kópshilikke tanys. Erekshe jasóspirim týraly biz buǵan deıin de jazǵan bolatynbyz. Qazaqstandyqtar úshin ómirge degen súıispenshilik qaharmanyna aınalǵan Álımen Respýblıka kúni qarsańynda taǵy bir áńgimelesýdiń sáti tústi. «Respýblıka qaharmandary» atty joba aıasynda ol QazAqparat tilshisimen áńgimede arman-maqsatymen bólisti.

- Álı, sen buǵan deıin álemge tanymal birqatar tulǵamen júzbe-júz kezdestiń. Alda taǵy kimdermen kezdesý josparda bar?

- Qazir tanymal Ronaldıno, Iker Kasılıas jáne Andrea Pırlo sekildi fýtbolshylardan shaqyrtý aldym. Degenmen atalǵan kezdesýler kelisim deńgeıinde. Sondyqtan ázirge naqty eshteńe aıta almaımyn.

- Fýtbolǵa degen yntań bárine belgili. Taıaýda Qatarda fýtboldan álem chempıonaty bastalady. Qandaı komandaǵa jankúıersiń? Kim jeńedi dep oılaısyń?

- Meniń oıymsha, fýtboldan Frantsııanyń qurama komandasy chempıon bolady. Olardyń komandasy myqty. Qurama tizimine qaraǵanda solaı kórinedi. Biraq óz basym Brazılııa komandasy úshin jankúıer bolamyn.

- 2019 jyly ÝEFA-nyń sýperkýbogyn jeńimpaz komandaǵa óz qolyńmen tabystadyń. Bul erekshe qurmet. Sol kezdegi sezimiń týraly aıtyp bershi?

- Iá, ÝEFA-nyń sýperkýbogyn tabys etý sáti meniń máńgi esimde qalady. Tabystaýdyń maǵan buıyrǵanyna sońyna deıin senbedim. Óte qatty qobaljydym. Sol túni tań atqansha uıyqtaı almaǵanym esimde. Bul erekshe sezim.

Fýtbolǵa degen qyzyǵýshylyǵyńnan bólek, júzýmen aınalysasyń. Nátıje qandaı?

- Iá, júzýmen kásibı túrde aınalysamyn. Bıyl maýsymda jasóspirimder arasynda úshinshi ret Qazaqstan Respýblıkasynyń chempıony atandym. Odan bólek, júzýden halyqaralyq sport sheberi boıynsha normatıvti oryndadym.

- Júzý boıynsha aldaǵy josparyń qandaı? Bolashaqta ózińdi osy sportpen baılanystyrasyń ba?

- Iá, júzý sportynda odan ári shyńdalǵym keledi. Bolashaqta atalǵan sporttan paralımpıada oıyndarynda elime altyn syılaǵym keledi. Árıne, ol úshin kóp eńbektený kerek.

- Álı, sen az ýaqyttyń ishinde kópshilikke tanymal boldyń. Saǵan qoldaý bildirýshilerdiń qatarynda álem juldyzdary da bar. Bloger bolǵyń kelmeı me?

- Buryn bloger bolǵym keletin, keıin ol oıdan aınyp qaldym. Sebebi blogerlik ýaqyt alady. Meniń maqsatym – júzýmen kásibı aınalysyp, altyn medal jeńip alý.

- Suhbat úshin raqmet! Bıik shyńdardy baǵyndyra ber.

Eske sala keteıik, 2019 jyly Álı Turǵanbekov QazAqparat tilshisine arnaıy suhbat bergen bolatyn.

Suhbat barysynda jasóspirim óziniń arman-maqsatymen bólisti.

2019 jyly tamyzda qazaqstandyq «Nık Výıchıch» atanǵan Álı Turǵanbekov óz qolymen aǵylshynnyń Lıverpýl oıynshylaryna ÝEFA Sýperkýbogyn tabystaǵan edi.

Osy oraıda jigerli jas balanyń tózimdiligi men órligine Memleket basshysy Qasym-Jomart Toqaev ta yqylasyn bildirdi.

Sondaı-aq otandasymyz Dıego Maradona, Messı jáne taǵy basqa áıgili fýtbolshylarmen kezdesti.

Foto:instagram/ali_amir_happy