Respýblıka qaharmandary: 90-nan astam aýyldy sport jabdyqtarymen qamtamasyz etken palýan

ASTANA. QazAqparat – Kúshtik ekstrımnen álemdik rekordshy Sergeı Tsyrýlnıkov kóptegen rekordtarymen jáne kúshtik nómirlerimen ǵana emes, sonymen qatar otanshyldyǵymen de tanymal. Sergeı aýyldardy sporttyq qural-jabdyqtarmen qamtý máselesin kóterip, jastardy sportqa baýlıtyn jobalardy iske asyrýmen qatar buqaraǵa kúsh mádenıetin nasıhattap júr, dep habarlaıdy QazAqparat tilshisi.

- Sergeı, qazirgi jobalaryńyz jaıly aıtyp berseńiz. Kúsh mádenıetin kópshilikke tanytýdy jalǵastyra beresiz be?

- Kóptegen jobalar bar: bul - «100 aýl», «Batyrs battle», «UPF». Sporttyq batldardy da ótkizýdi qolǵa aldyq. Kıno túsirý, semınarlar jumys jáne ızometrııalyq gımnastıka jattyǵýlaryna arnalǵan qosymshamen jumys istep jatyrmyn. Batys naryǵyna shyǵý nıetimizde bar. Kúsh mádenıetine keletin bolsaq, negizinen aýyl jastaryna semınarlar ótkizemin. Sondaı-aq mıllıondaǵan adamdy qamtıtyn áleýmettik jeliler arqyly da jumys isteımin.

- Aýyldarda qarapaıym sport jabdyqtarynyń joqtyǵyn birneshe ret kóterdińiz. Bul máseleni sheshýge bola ma?

- «100 aýyl» baǵdarlamam aıasynda aýyldardy aralap, 94 mektepti sporttyq qural-jabdyqtarmen qamtamasyz ettim. Bul óte az, aýyl mektepteriniń 90 paıyzy tipti, 50 paıyzǵa deıin sporttyq jabdyqtarmen jabdyqtalmaǵan. Biz bolǵan árbir mektepte, tipti memleket tarapynan berilgen sporttyq qural-jabdyqtardyń sapasy syn kótermeıdi. Aýyldarda qarapaıym sport jabdyqtaryna qatysty problema jetkilikti. Al keıbirinde sport zaldary jóndeýdi qajet etedi jáne normalarǵa sáıkes kelmeıdi dep senimdi túrde aıta alamyn. Bul máseleni men sheshe almaımyn.... Bul depýtattar men jergilikti organdar sheshýi kerek másele. Onyń ornyna olar salyq tóleýshilerdiń aqshasyn legıonerler men kásibı klýbtarǵa jumsaıdy. Al olardyń ıek astynda balalar bıliktiń kóńil aýdarýyna, qarapaıym qural-jabdyqqa muqtaj.

- Siz ártúrli kúshtik nómirlerden álem rekordshysyz. Jaqyn bolashaqta otandastaryńyzdy qalaı tańǵaldyrýdy josparlap otyrsyz?

- Tańǵaldyrý maqsatymda joq. Qazir áleýmettik jobalarmen jáne aýyldarǵa kómek kórsetýmen aınalysyp júrmin. Jaqynda AQSh-ta bolyp, sheteldik jurtshylyqty tańǵaldyrdym jáne elimizdiń kúsh mádenıeti týraly aıtyp berdim.

- Áleýmettik jelide qural-saıman satatyn dúkenderge kirip, balǵa jáne ózge de zattardy maıystyrǵan vıdeolaryńyzdy jıi jarııalaısyz. Satýshyǵa ne dúken ákimshiligine is-áreketińizdi aldyn ala eskertesiz be?

- Árıne, vıdeodaǵy is-áreketimniń barlyǵy satýshymen aldyn ala kelisilgen. Munyń ústine bul dúkenge óte jaqsy jarnamada da. Máselen, sýpermarkette tabany maıystyrǵan vıdeo 12 mıllıonnan astam qaralym jınady. Al bul degenińiz sýpermarketke óte kúshti jarnama ǵoı. Ne bolmasa gazdalǵan sýsyn bankisin ashqan vıdeony áleýmettik jeliniń 70 mıllıonnan astam qoldanýshysy kórdi. Olardyń basym kópshiligi Qazaqstan týraly alǵash ret estise, endi biri bizdiń kúsh mádenıetimizdi zerdeleı bastady. Vıdeolardyń arqasynda Qazaqstanǵa kóptegen týrıst keldi. Munyń bári áleýmettik jeli men vıdeolardyń arqasy.

- Sońǵy ýaqytta áleýmettik jelide qańyltyr bankiniń joǵary bóligin ashqan sátińiz taspalanǵan vıdeolar kóp shyqty. Saýsaqtaryńyzdy jaraqattap almaısyz ma?

- Banki ashýǵa keler bolsa, árıne jaraqattanasyń… Saýsaqtaryńdy kesip ketetin kez de bolady. Biraq, munyń negizdemesi bar. Birinshiden – qarjylaı, ekinshiden – kreatıvti. Aıtalyq, meniń vıdeolarymdy 150 mln aýdıtorııasy bar álemniń kóptegen tanymal blogerleri jarııalady. Sondaı-aq áreketimizdi qaıtalaýǵa tyrysqandar da boldy. Máselen – Edı Holl (Ǵalamshardaǵy eń kúshti adam). Jalpy, vıdeolarymdy álemniń ártúrli iri áleýmettik jelilerinde 700 mıllıonnan astam adam tamashalady. Bul elimiz úshin, bizdiń kúsh mádenıetimiz úshin óte jaqsy nasıhattyń bir túri ǵoı.

- Qaı rekordyńyz óte qıyn boldy?

- Menińshe, eń qıyny 1 200 kelilik júktemesi bar kalıbrlengen taǵany maıystyrý bolǵan sııaqty. 36 sekýndtyń ishinde 4 taǵany maıystyra aldym. Qazirgi ýaqytta Qazaqstanda eshkim mundaı taǵanyń bireýin de maıystyra almaıdy. Al álemde bul taǵany maıystyratyn adamdar sanaýly ǵana. Onyń ústine olar ýaqytqa eseptemeıdi.

- Halyq arasynda ızometrııany odan ári ilgeriletýge qatysty josparyńyz qandaı?

- Qazir qosymshaǵa arnalǵan «Arr-men» jáne álemdik naryqtarǵa, atap aıtqanda AQSh-qa shyǵý úshin jumys istep jatyrmyn. Meniń qoldanbam men baǵdarlamalarym Amerıkada synalǵanyn qalaımyn. Kúsh mádenıetin ilgeriletý – bul meniń jolym jáne balalarmen ári qaraı jumys isteı beremin. Olarǵa bizdiń kúsh dástúrlerimiz ben batyrlarymyz týraly aıtyp, túsindirýimdi jalǵastyramyn.

- Suhbatyńyzǵa raqmet!