Respýblıka qaharmandary: 70 jastaǵy taksıst ana ómirge esh ókpelemeýge keńes beredi
Gúlshara Joldasbaeva dese eshkim eleń ete qoımaýy múmkin, al «taksıst Gúlshara» dese Mańǵystaý oblysy Mańǵystaý aýdanynyń Shetpe aýyly men Aqtaý qalasy arasyna qatynaıtyn kez kelgen jolaýshy tanıdy. Bári rızashylyqpen ol kisi týraly áńgimeleı ketedi. Óıtkeni Gúlshara 23 jyldan beri temir tulparyn tizgindep, osy aımaqta jolaýshy tasyp keledi. Keıipkerimiz alǵash ret 1999 jyly 46 jasynda alǵash ret kólikke otyrǵan eken.
«Bul ómirdiń san túrli qıynshylyqtary bar ǵoı. Biraq oǵan moıyp, mort synyp qalý degen bolmaıdy. Qıyn jaǵdaılarǵa men de tap boldym. Balalar kishileý boldy. Súıenetin joldasym da joq. Amalsyzdan balalardy asyraý úshin kólikke otyrǵan edim. Basynda aýyldyń ishinde taksıst boldym. Ol kezde mundaı qyzmet túri joq edi. Aýyldastarym tańqalatyn edi. Sodan 4-5 jyldan soń Shetpe-Aqtaý tas jolyna shyqtym» dedi Gúlshara Joldasbaeva.
Áıeldiń kólik júrgizgenine aýyldastary tańqalǵan. Senimsizdikpen qaraıtyndar da kezdesken. Al qazir 15 jyldan beri kele jatqan turaqty jolaýshylary bar. Talaı jyl tas jolda júrgen ol tártip buzyp, jyldamdyqty asyryp zańǵa tartylmaǵan. Senimdi júrgizýshi mezgil tańdamaıdy. Tań sári demeı, tún demeı júre beredi. Júkti kelinshekti oblys ortalyǵyndaǵy bosaný úıine, asyqqan jolaýshyny aeroportqa jetkizgen kezderi az bolmapty.
«Taksıst bolyp tapqan tabysyma 7 balamdy asyrap baqtym. Eshqaısysyn qatarynan kem qylmadym. Al joldyń qaýip-qateri kóp. Keıde sharshap ta júrdim. Tehnıka bolǵasyn isten shyǵatyn, jóndep úırendim» dedi qasqaıyp Gúlshara.
Gúlsharanyń azamattardaı jigerililigin, qajyrlylyǵyn aınalasynyń bári moıyndaıdy. Onyń adamnyń janyn túsinetin meıirimdiligi, kisiniń kóńiline qaraıtyn kishipeıildiligi, jolaýshyny jolynan qaldyrmaıtyn jaýapkershiligi de bar. Tanıtyndar taksıst apaıdy osy qasıetteri úshin erekshe syılaıdy.
«Men neshe túrli kóńil kúıdegi adamdarmen saparlas bolamyn. Sondyqtan da ábden psıholog bolyp alǵan sııaqtymyn. Qınalyp otyrǵan jolaýshyǵa sál de bolsa moraldyq qoldaý kórsetip, al qýanyp kele jatqandardyń kóterińki kóńiline ortaqtasyp otyramyn. Kóligimde kóbinese Shámshiniń ánderin qosyp qoıamyn, maǵynasyz-mánsiz dúnıelerdi tyńdamaýǵa da, tyńdatpaýǵa tyrysamyn», dep óziniń patrıottyq kózqarasyn da jetkizip qoıdy.
Gúlshara Joldasbaevanyń olaı etýi oryndy-aq. Óıtkeni ol óner ordasy atanǵan Jyńǵyldy aýylynyń týmasy. Kúıshi, halyq kompozıtory Esir Aıshýaqulynyń urpaǵy. Ákesi Myńbaı da 1957 jyly Máskeýdegi Jastar men stýdentterdiń búkildúnıejúzilik VI festıvaline qatysqan ataqty kúıshi bolǵan.
Ul-qyzdaryna ulttyq tárbıe berip, elin, otanyn súıýge baýlyǵan. Al ózi qyzmetin adal atqarýǵa tyrysady. 23 jyl jolda júrgende ol 5 kólik aýystyrǵan. «Jıgýlı 2106», «Moskvıch 412», «Opel» avtokólikterin tizgindese, qazir «Nissan Primera» markaly kólikti aıdap júr. Bir qyzyǵy, ol mehanıkalyq kólik quraldaryn ǵana basqarady.
«Jasym 70-ke jaqyndady. Áli de joldamyn. Balalarym eseıdi, qazir bári jetkilikti. Biraq osy kásipke degen súıispenshiligim meni úıde otyrǵyzbaıdy. Avtovokzalda jınalǵan taksısterdiń ishindegi eń úlkeni menmin. Olar meni kezeksiz ótkizip jiberip jatady. Azamattar syılaıdy» deıdi ol.
Gúlshara 3 ul, 4 qyz súıgen baqytty ana. 9 nemere, 13 jıen, 1 shóbereniń súıikti ájesi. Jas ulǵaıǵanda temir tulpar tizgindep uzaq joldan oralǵanda onyń sharshaýyn basatyn – úıdegi kishkentaılar. Taǵdyrdyń talqysymen erlerdiń kásibin meńgerse de, ol óz ómirine ókpelep kórgen emes.
«Er-áıel deıtin eshteńesi joq, árkimniń óziniń jigeri, talaby júreginde. Qoryqpaý kerek, júregiń ne deıdi, sony jasaý kerek. Óziń tańdaǵan jumysyńdy adal isteýiń kerek. Nıet bolsa, jumys kóp. Qol qýsyryp, kóringenge ókpelep otyrýǵa bolmaıdy. Elimiz tynysh bolsyn. Urpaqtarymyz aman bolsyn!» dedi.
