Respýblıka bıýdjetine transfert aýdaratyn jańa donor óńirler paıda bolady — Azamat Ámrın

ASTANA. KAZINFORM — Ulttyq ekonomıka mınıstriniń birinshi orynbasary Azamat Ámrın Astana halyqaralyq forýmynyń (AIF) kýlýarynda respýblıka bıýdjetine óńirlerden alatyn transfert aldaǵy 3 jylda artatynyn aıtty. 

Vıtse-mınıstr onyń sebebin óńirlerdiń bıýdjetin qalyptastyratyn salyq mólsheri jyl saıyn 25 paıyz ósim kórsetip kele jatqanymen baılanystyrady.

— Áli sanap jatyrmyz. Jalpy sıpattaǵy transfert boıynsha memorgandarmen, aýmaqtarmen (óńirlermen — red.) tyǵyz baılanys júrip jatyr. Búgingi tańda aldyn ala málimetke qarasaq, kerisinshe donor oblystardan alatyn transfert ulǵaıady. ıAǵnı, olar burynǵyǵa qosymsha transfert beredi. Mysaly, bıyl Astana, Almaty, Atyraý oblystarynan 504 mlrd teńge alsaq, aldaǵy 3 jyldyqta bul san ósedi dep oılaımyn. Naqty tsıfrdy aıta almaımyn, qazir esep júrip jatyr. Biraq bıylǵydan úlken bolatynyn qazirdiń ózinde kórip otyrmyz, — dedi ol.

Aıtýynsha, donor óńirlerdiń qataryna jańa oblystar qosylaýy múmkin.

 — Óńirlerdiń bıýdjetine túsetin negizgi úsh salyq bar — korporatıvtik tabys salyǵy, áleýmettik salyq jáne jeke tabys salyǵy. Osy salyqtar jyl saıyn respýblıka boıynsha orta eseppen 25 paıyz qarqynmen ósip kele jatyr. Osy ósim bizge donor óńirlerden kóbirek transfert alýǵa múmkindik beredi. Onyń ústine qazirgi úsh donor óńirden basqa óńirler paıda bolýy múmkin. Qazir naqty qaı óńir ekenin aıtýǵa erte. Ótken jyldyń statıstıkasy tamyz aıynyń 2 tamyzda shyǵý kerek. Sonda tamyzdyń ortasyna qaraı naqty málimet belgili bolady, — dedi vıtse-mınıstr.

Eske salsaq, Azama Ámrın Senattaǵy óńirler men ortalyq memlekettik organdar arasyndaǵy bıýdjet qatynastaryn reformalaý máselesine arnalǵan dóńgelek ústelde bıýdjetke donor bolyp otyrǵan óńirlerden alatyn transfertter kólemi azaıatynyn málim etken bolatyn.