Respýblıka boıynsha Jańaqorǵan aýdanynyń dene shynyqtyrý jáne sport bólimi úzdik dep tanyldy - Qyzylorda oblysy
QYZYLORDA. QazAqparat- Ústimizdegi jyldyń 4 aqpan kúni Astana qalasynda «Jyl sportshysy - 2014» respýblıkalyq baıqaýynyń jeńimpazdaryn marapattaý sharasy ótti. QR Mádenıet jáne sport mınıstrliginiń 2014 jyldyń qorytyndysymen 10 atalym boıynsha sport salasyndaǵy úzdikterdi marapattady.
Onyń ishinde 2 nomınatsııany qyzylordalyqtar ıelendi. Atap aıtsaq, aýyr atletıkadan QR eńbek sińirgen sport sheberi, 4 dúrkin Álem chempıony, 2 dúrkin Olımpıada chempıony Ilıa Ilın «Jyldyń úzdik sportshysy» nomınatsııasyna ıe bolsa, respýblıka boıynsha «Úzdik aýdandyq dene shynyqtyrý jáne sport bólimi» nomınatsııasyn Qyzylorda oblysy, Jańaqorǵan aýdandyq dene shynyqtyrý jáne sport bólimi jeńip aldy. Bul týraly oblystyq dene shynyqtyrý jáne sport basqarmasynyń baspasóz qyzmeti habarlady.
Aıta keteıik, 2013 jyldyń qorytyndysynda «Úzdik aýdandyq dene shynyqtyrý jáne sport bólimi» nomınatsııasyn Qarmaqshy aýdandyq dene shynyqtyrý jáne sport bólimi enshilegen bolatyn.
