Respýblıka boıynsha otbasy úlgisindegi 10 balalar aýylynda 610 bala tárbıelenýde
ASTANA. Maýsymnyń 23-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine otbasy úlgisindegi balalar aýyly jáne jasóspimirder úıleri máseleleri boıynsha ózgerister men tolyqtyrýlar engizý týraly» zań jobasyn maquldady.
Atalǵan zań jobasy jetim balalar men ata-anasynyń qamqorlyǵynsyz qalǵan balalarǵa arnalǵan bilim berý ınternat uıymdarynyń tárbıelenýshilerin áleýmettik qoldaý, jasóspirimder úılerinde áleýmettik beıimdelýden ótý úshin osy uıymdardyń túlekteri qatarynan adamdar tobyn ulǵaıta túsý maqsatynda ázirlengen. Bilim dáne ǵylym mınıstri Janseıit Túımebaevtyń aıtýynsha, atalǵan zań jobasynda «SOS» - balalar aýyldaryn» qurý jónindegi halyqaralyq qoǵamdyq uıym usynymdary meılinshe eskerilgen. «Búgingi kúni respýblıkamyzda jetim balalardy otbasyna jaqyndatylǵan túrde tárbıeleý múmkindigin beretin balalar aýyldary men jasóspirimder úıleri damý ústinde. Qazirgi ýaqytta respýblıka boıynsha 610 bala tárbıelenip otyrǵan otbasy úlgisindegi 10 balalar aýyly bar. Sonymen qatar, 27 jasóspirimder úılerinde balalar úıiniń 1 myń 300-den astam bitirýshileri turyp jatyr», dedi J. Túımebaev.
Toqtala ketetin jaıt, búgingi kúni jasóspirimder úılerinde tek otbasy úlgisindegi balalar aýyly men balalar úıleriniń túlekteri ǵana tura alady. Osyǵan baılanysty, zań jobasynda jasóspirimder úılerinde áleýmettik beıimdelýden ótý úshin balalar úıleriniń jáne jetim balalar men ata-anasynyń qamqorlyǵynsyz qalǵan balalarǵa arnalǵan mektep-ınternattar túlekteri ishinen qaldyrylatyn sanattar tobyn ulǵaıtý kózdeledi.
Májilis maquldaǵan zań jobasy Parlament Senatyna jiberiledi.
