Respýblıka boıynsha múmkindigi shekteýli balalarǵa arnalǵan uzaq merzimdi áleýmettik joba iske asyrylmaq
ALMATY. 6 jeltoqsan. QazAqparat /Názıra Eleýhan/ - Elimizdegi «Mega Ice» muz aıdyny 1 qańtardan bastap «Batyl qadam» atty múmkindigi shekteýli balalarǵa (mı sal aýrýyna shaldyqqandarǵa (DTsP)) arnalǵan uzaq merzimdi áleýmettik jobany iske asyrýdy josparlaýda.
«Bizdiń kompanııa 2008 jyldan beri múmkindigi shekteýli balalarǵa arnalǵan arnaıy baǵdarlama jetistikpen iske asyp keledi. Olaı deýime sebep, osy baǵdarlamanyń arqasynda óz erkimen aıaǵymen tura almaıtyn qanshama bala búginde alǵashqy qadamdaryn jasap, júrýde. Mundaı nátıjeni ózimiz de kútpegen edik. Jetistik beretin baǵdarlamany endi biz respýblıkalyq deńgeıde iske asyrýdy josparlap otyrmyz. Elimizde sal aýrýyna shaldyqqan balalardy emdeý-ońaltý ortalyqtary tapshy ekendigin eskersek, bul joba kóptegen balalarǵa kómegin tıgizedi degen senimdemiz», - dedi jobany iske asyrýshy «Mega Ice» muz aıdyny kompanııasynyń PR-menedjeri Anar Táýetaeva.
Onyń aıtýynsha, joba Almaty, Aqtaý, Aqtóbe, Shymkent qalalarynda iske asyrylmaq. «Joba kommertsııalyq emes. Oǵan 4 jas pen 20 jas aralyǵyndaǵy múmkindigi shekteýli 100 bala jáne olardyń ata-analary qatysady. Jalpy jattyqtyrýshylardyń sany 10 adam», - dedi ol.
