Respýblıka boıynsha mektep jasyndaǵy balalardyń tek 23 paıyzy ǵana qosymsha bilimmen qamtylǵan - Á. Bımendına
ASTANA. QazAqparat - Respýblıka boıynsha mektep jasyndaǵy balalardyń tek 23 paıyzy ǵana qosymsha bilimmen qamtylǵan. Bul týraly búgin Astanadaǵy Oqýshylar saraıynda Parlament Májilisi Áleýmettik-mádenı damý komıtetiniń kóshpeli otyrysy kezinde depýtat Ásıma Bımendına aıtty.
«Respýblıka boıynsha balalardyń 23 paıyzy qosymsha bilim berý úıirmelerimen qamtylý degen óte oılandyratyn másele. Óıtkeni balalar mektepten keıingi bos ýaqytyn óziniń keleshek ómirine qajet bilim jınaýmen ótkizýi tıis. Ózderińiz bilesizder, osy Oqýshylar saraıynda 10 myńǵa jýyq balalar 109 túrli úıirmelerden qosymsha bilim alyp jatyr. Sonymen qatar, qalada M. Ótemisov atyndaǵy oqýshylar saraıy, túrli mýzykalyq mektepter bar. Bulardyń barlyǵy oqýshylardyń mektepten tys kezdegi ýaqytyn tıimdi paıdalanýǵa taptyrmas oryndar», - dep atap ótti ol.
Onyń aıtýynsha, mundaı mekemeler oblystarda, aýdandarda kóptep salynsa, balalardyń bos ýaqytyn tıimdi retteýge múmkindik beredi. «Búgingi otyrysta kóterilip otyrǵan máselelerdiń biri - ár qalada qosymsha bilimmen qamtylǵan balalardyń sanyn 60-70 paıyzǵa deıin kóterý máselesi bolyp otyr. Eger ondaı kórsetkishke qol jetkizsek, ata-analar da balalarynyń keleshegi úshin alańdamaıtyn bolar edi», - dep atap ótti Á. Bımendına. Aıta ketý kerek, «Qosymsha bilim berý júıesiniń jaǵdaıy, onyń balalar men jasóspirimderdiń shyǵarmashylyq qabiletterin damytýdaǵy mektep oqýshylaryna kásibı baǵdar berý jaıy jáne olardyń bos ýaqytyn uıymdastyrýdaǵy róli» taqyrybynda ótken sharaǵa Májilistiń vıtse-spıkeri Darıǵa Nazarbaeva men Áleýmettik-mádenı damý komıtetiniń depýtattary, ortalyq jáne jergilikti atqarýshy organdardyń jaýapty qyzmetkerleri, qosymsha bilim berý uıymdarynyń basshylary, úkimettik emes uıymdar men BAQ ókilderi qatysty.
