Respýblıka boıynsha máslıhat depýtattyǵyna saılaý ótti
ASTANA. 28 qazan. QazAqparat - «Qazaqstan Respýblıkasyndaǵy saılaý týraly» QR Konstıtýtsııalyq zańynyń 101-baby 4-tarmaǵyna sáıkes keshe respýblıkanyń 14 óńirindegi 72 saılaý okrýginde shyǵyp qalǵan máslıhat depýtattarynyń ornyna saılaý ótti. Bul týraly atalǵan komıssııa baspasóz qyzmetiniń jetekshisi Venera Jeksembekova málim etti.
Onyń atap ótýinshe, keshe Astana qalasynyń máslıhat depýtattary,18 oblystyq, 18 qalalyq jáne 36 aýdandyq máslıhat depýtattary saılanǵan. Usynylǵan 244 kandıdattyń 77-si saıası partııalar men qoǵamdyq birlestikter atynan tússe, qalǵan 167-si ózin-ózi usynǵan. Ortasha básekelestik 1 depýtattyq mandatqa 2-den asa kandıdat bolǵan. Saılaýshylar tizimine 478344 adam engizilip, onyń 338016-sy daýys berýge qatysqan.
«Saılaýshylardyń ortasha jasy 47 jasty quraıdy. 67 depýtattyń joǵary bilimi bar. Mamandyǵy boıynsha on toǵyzy - ınjener, on úshi - ekonomıst, ony - oqytýshy, segizi - dáriger, beseýi - aýyl sharýashylyǵy mamany, beseýi - zańger, altaýy - basqa mamandyq ıeleri, bireýi mamandyǵyn kórsetpegen», - deıdi ol.
V.Jeksembekovanyń aıtýynsha, saılaý naýqany saılaý zańnamasy talaptaryna saı ótkizilgen. OSK-ge 4 aryz túsip, olar komıssııa músheleri tarapynan tıisinshe jaýaptar men túsiniktemeler alǵan.
