Respýblıka boıynsha kóptegen balabaqshanyń jabylyp qalý qaýpi bar – depýtat
«Memlekettiń qoldaýynyń arqasynda respýblıka boıynsha 2012 jyldan bastap kóptegen kásipker jekemenshik balabaqshalar ashýǵa bet burǵan bolatyn. Óz jumysyn bastaý úshin bankterden mıllıondaǵan teńge nesıe alyp, ǵımarattardy jalǵa alyp, óz jumysyn bastap, balabaqshaǵa jyldar boıy bara almaı, kezegin kútip júrgen myńdaǵan sábıdiń, ata-analardyń áleýmettik problemalaryn sheship, balalardyń mektepke deıingi tárbıemen qamtylýyn joǵary deńgeıge kóterýge qol jetkizdi. Alaıda sol ıgi isti qolǵa alǵan kásipkerler qazir Úkimetten qoldaý taba almaı, kóptegen balabaqshanyń jabylyp qalý qaýipi tónip tur», - deıdi ol Úkimet basshysyna joldaǵan depýtattyq saýalynda.
Fahrıddın Qarataevtyń aıtýynsha, Bilim mınıstriniń 2017 jylǵy 27 qarashadaǵy №597 buıryǵyna sáıkes 2018 jyldan bastap, jan basyna shaqqandaǵy qarjylandyrý mólsheri 28 280 teńge etip belgilengen. Respýblıka boıynsha Almaty oblysynda 31 000 teńge, Aqtóbede - 28 800, Qaraǵandyda - 29 300, Shyǵys Qazaqstanda - 29 150, Tarazda - 29 344, Shymkent qalasynda - 28 350, Aqtaý qalasynda 28 350 teńge tólenýde.
«Al, Túrkistan oblysynda osy kúnge deıin respýblıka boıynsha eń az mólsherde 20 988 teńge esebinen tólenýde. Sonyń ishinde Maqtaaral, Jetisaı, Kentaý aýdandarynda 18 000-19 000 teńge. Aqmola oblysynyń Tselınograd, Býrabaı, Zerendi aýdandarynda da 23 000-25 000 teńge aralyǵynda jáne Pavlodar qalasynda 20 246 teńge tólenýde. Otandyq kásipkerler tarapynan bul másele týraly 1 jyldan beri barlyq ınstantsııaǵa hat joldanǵanymen, eshqandaı oń sheshim tappady», - dedi ol.
Depýtat pedagogtardyń aılyq jalaqysy bıyl 25 paıyzǵa kóterilgenin, Prezıdenttiń bıylǵy Joldaýynda kelesi jyly pedagogtardyń jalaqysyn taǵy da 25 paıyzǵa kóterýdi tapsyrǵanyn eske saldy.
«Sonda kásipkerler Memleket basshysynyń tapsyrmasyn qalaı oryndaıdy? Jeke balabaqshalar men memlekettik balabaqshalar pedagogtary arasynda áleýmettik teńsizdikke nelikten jol berilýde? Bul másele aldaǵy ýaqytta sheshimin tappasa respýblıka boıynsha kóptegen balabaqshalar jabylyp, ata-analardyń áleýmettik máselesi sheshilmeı qalatyny anyq. Sondyqtan da, Memleket basshysynyń 2020 jylǵy 1 qyrkúıektegi Joldaýy men Bilim jáne ǵylym mınıstriniń 2018 jylǵy 31 qazandaǵy №597, 598 buıryǵyna sáıkes, barlyq oblystar boıynsha jan basyna qarjylandyrý mólsherin sáıkestendirý qajet dep esepteımiz», - dedi Fahrıddın Qarataev.
