Respýblıka boıynsha qazaq tilinde qaralatyn sot isteriniń sany áli de tómen - Joǵarǵy Sot Tóraǵasy
TANA. 22 qyrkúıek. QazAqparat /Rýslan Ǵabbasov/ - Respýblıka boıynsha qazaq tilinde qaralatyn sot isteriniń sany áli de tómen.
Bul týraly búgin Astanada «Sot isin memlekettik tilde júrgizýdiń ózekti máseleleri» taqyrybynda ótken dóńgelek ústelde Joǵarǵy Sot Tóraǵasy Bektas Beknazarov málim etti.
«Eń basty másele - respýblıka boıynsha qazaq tilinde qaralatyn sot isteriniń sany áli de tómen. Bul arada osy olqylyq úshin tek jergilikti sottardyń basshylary men sýdıalary kináli degen pikirden aýlaqpyn. Osy máseleni zerdeleý kezinde is bastapqyda qaı tilde qozǵalsa, sot isi de sol tilde qaralatyny kórsetip otyr»,-dedi ol.
Qazaqstanda 2009 jyly ótken sońǵy halyq sanaǵynyń derekteri boıynsha 15 jáne odan joǵary jastaǵy adamdardyń 65 paıyzy qazaq tilin erkin meńgergen. «Oblystyq sottardyń bergen málimetteri boıynsha biz sondaı qajetti derekterdi jınadyq. Bıylǵy birinshi jartyjyldyqtyń qorytyndylary boıynsha memlekettik tilde qaralǵan sot isteriniń sany 25 paıyzdy ǵana quraıdy»,-dedi B. Beknazarov. Birinshi satyly sottarda qaralǵan qylmystyq isterdiń 28 paıyzy, azamatyq isterdiń 15 paıyzy, ákimshilik isterdiń 26 paıyzy ǵana memlekettik tilde qaralyp otyr. Sot isteri negizinen qazaq tilinde qaralǵan óńirlerdiń arasynda Qyzylorda (75 paıyz), Atyraý (71 paıyz), Ońtústik Qazaqstan (61 paıyz), Mańǵystaý (58 paıyz) oblystary bar.
«Al Soltústik Qazaqstan, Pavlodar, Aqmola, Qostanaı oblystary men Almaty qalasyndaǵy sottarda kerisinshe memlekettik tilde qaralǵan ister az bolyp otyr»,-dedi Joǵarǵy Sot Tóraǵasy.
