Respýblıka boıynsha 3222 túlek «Altyn belgige» laıyq ekendikterin dáleldedi
ASTANA. 13 maýsym. QazAqparat /Marlan Jıembaı/ - Respýblıka boıynsha 3222 túlek «Altyn belgige» laıyq ekendigin dáleldedi. Bul týraly búgin Úkimet otyrysynda QR Bilim jáne ǵylym mınıstri Baqytjan Jumaǵulov málim etti.
«Aǵymdaǵy jyly UBT tapsyrý joǵary deńgeıde ótti. Zań buzýshylyq bolǵanda biz ony jyldaǵydaı jasyrǵan joqpyz, halyqqa ashyq aıtyp otyrdyq. Sonyń ishinde erekshe aıtyp ketetin jaǵdaı Jańaqorǵanda bolǵan oqıǵada biz balalarǵa túsindirip aıttyq. Bul jerde zań buzýshylyq bar, sondyqtan qaıtadan test tapsyrasyzdar dedim. Birinshi ret tapsyrǵanda 505 balanyń ortasha baly 107 bolsa, al ekinshi ret tapsyrǵanda olardyń ortasha baly 80-di qurady», - dedi mınıstr.
Onyń atap ótýinshe, aǵymdaǵy jyly 129 myńnan astam bala test tapsyrýǵa ótinish berse, sonyń 3 myńnan astamy synaqqa qatyspaǵan.
Sondaı-aq aǵymdaǵy jyly 5 myńnan astam túlektiń «Altyn belgige» úmitker bolǵandyǵyn aıta kele: «Sol úmitkerlerdiń Ulttyq biryńǵaı test tapsyrǵannan keıin 3222-si óziniń «Altyn belgi» ala alatyndyǵyn dáleldedi. Myń balanyń synaq nátıjesinde «Altyn belgige» 1 ǵana baly jetpeı qaldy», - dedi ol.
B.Jumaǵulovtyń aıtýynsha, atalǵan túlekterge qyzyl atestat beriledi.
