Respýblıka boıynsha 14,7 mln tonna astyq bastyryldy
ASTANA. QazAqparat - Sońǵy málimetterge sáıkes, astyq alqabynyń 76,7 paıyzy orylyp, 14,7 mln tonna astyq bastyryldy. Bul týraly búgin QR Úkimetiniń selekorlyq rejımdegi otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov málim etti, dep habarlaıdy QazAqparat.
«Búgingi tańda respýblıka boıynsha 11,6 mln gektar alqaptyń astyǵy jınalyp, 14,7 mln tonna dándi daqyl bastyryldy. Egin jınaý naýqany byltyrǵy jyldyń osy ýaqytymen salystyrǵanda, 2,4 mln gektarǵa nemese 16 paıyzǵa artyq. Jalpy respýblıka boıynsha barlyq egistik alqaptyń 76,7 paıyzy jınaldy. Ońtústik, Batys Qazaqstan jáne Jambyl oblystarynda masaqty dándi-daqyldardy jınaý aıaqtaldy», - dedi ol.
Birinshi vıtse-mınıstrdiń dereginshe, elimizdiń soltústigindegi basty astyqty óńirlerinde 10,6 mln tonna astyq jınalǵan. Atap aıtqanda, Aqmola oblysynda 3,5 mln, SQO-da 3,3 jáne Qostanaı oblysynda 3,8 mln tonna astyq bastyryldy. Sonymen qatar ol bıdaı, arpa, baý-baqsha jáne maıly daqyldardy jınaý jumystaryna da toqtaldy.
«Arpany jınaý jumystary aıaqtalýda. Qazirgi ýaqytta 1,8 mln gektar nemese jalpy aýmaqtyń 86 paıyzy jınalyp, 2,7 mln tonna ónim alyndy. Bul kórsetkish byltyrǵy jyldyń kóleminen 10 paıyzǵa artyq. Baqsha daqyldaryn jınaý jumystary da jalǵasýda. Almaty, Jambyl, Ońtústik Qazaqstan oblystary boıynsha egistik alqabynyń 76 paıyzy jınalyp, odan 3,1 mln tonna ónim alynyp otyr. Qant qyzylshasy byltyrǵy jylmen salystyrǵanda 1,5 ese artyq jınalady dep kútilýde», - dedi Qaırat Aıtýǵanov.
