Respýblıka boıynsha egistikti sýarýǵa shamamen 6 mlrd tekshe metr sý alyndy
ASTANA.KAZINFORM - Sý resýrstary jáne ırrıgatsııa mınıstri Nurjan Nurjigitov elimizde vegetatsııa kezeńiniń turaqty ótýin qamtamasyz etý máselesine arnalǵan apparat keńesin ótkizdi. Sońǵy málimetterge sáıkes, búgingi tańda respýblıka boıynsha egistikti sýarýǵa jalpy kólemi 5,9 mlrd tekshe metr sý alynyp, 701 myń gektar egis alqaby sýaryldy.
Boljamǵa sáıkes, bıylǵy vegetatsııa maýsymynda respýblıka boıynsha 1,2 mln gektar aýyl sharýashylyǵy alqabyn sýarý úshin shamamen 11 mlrd tekshe metr sý alý josparlanyp otyr.
Vegetatsııa kezeńi bastalǵaly elimizdiń sharýalarymen sýarý sýyn jetkizý boıynsha 35 309 kelisimshart jasaldy. Onyń 26 585-i Sý resýrstary jáne ırrıgatsııa mınıstrligi ázirlegen bıllıng júıesi arqyly «Qazsýshar» respýblıkalyq memlekettik kásipornymen elektrondy formatta rásimdelgen.
Almaty, Jambyl, Qyzylorda, Túrkistan jáne Jetisý oblystarynda jalpy 829 myń gektar egis alqabyn sýarýǵa arnalǵan 33 645 kelisimshart jasalǵan. Onyń ishinde 77,7 myń gektary kúrish alqaptaryna tıesili. Aldyn ala málimet boıynsha, búginge deıin Qazaqstannyń ońtústik óńirlerinde 5,8 mlrd tekshe metr sý alynyp, 585 myń gektar sýarmaly jer sýaryldy. Onyń ishinde 77,7 myń gektar kúrish alqaby tolyqtaı sýmen qamtamasyz etildi.
- Byltyr ońtústiktegi oblystarda bıylǵy vegetatsııa maýsymyna daıyndyq aıasynda kóshpeli keńester ótkizildi. Onda sý tutyný lımıtterin qatań saqtaý, ylǵaldy kóp qajet etetin daqyldardyń egis kólemin kezeń-kezeńimen qysqartý, egis qurylymyn ártaraptandyrý jáne sý únemdeý tehnologııalaryn mindetti túrde engizý qajettigi erekshe atap ótildi. Osy óńirlerdiń árqaısysynda jaǵdaıdy turaqty baqylap, túsindirý jumystaryn júrgizetin arnaıy jumys toptary quryldy. Qazirgi aýa raıy jaǵdaıynda belgilengen barlyq sý paıdalaný lımıtteriniń qatań saqtalýyn qamtamasyz etý asa mańyzdy,- dedi Sý resýrstary jáne ırrıgatsııa mınıstri Nurjan Nurjigitov.
25 myń gektar jerdi sýarýǵa múmkindik beretin joba qolǵa alynǵanyn jazǵan edik.
