Respýblıka boıynsha 66 kásiporyn 1,7 myńnan astam jumyskerge bereshek
ASTANA. KAZINFORM — Jyl basynan beri memlekettik eńbek ınspektorlary 15,1 myńnan asa jumyskerdiń quqyǵyn qorǵady, dep habarlaıdy Eńbekmıni baspasóz qyzmeti.
2025 jylǵy 1 mamyrdaǵy jaǵdaı boıynsha memlekettik eńbek ınspektorlary respýblıkanyń 66 kásiporny 1,7 myńnan astam jumyskerge 672 mln teńgege jalaqy boıynsha bereshek ekenin anyqtady. Sonymen birge túrli uıymdarda júrgizilgen tekserýler barysynda eńbek quqyǵy buzylýynyń 2,3 faktisi anyqtaldy.
— Jalaqy boıynsha bereshegi jáne eńbek quqyǵynyń buzylýy anyqtalǵan kásiporyndardyń basshylaryna oryndaýǵa mindetti 1 283 uıǵarym berildi jáne 152 mln teńgeden astam somaǵa aıyppul salyndy. Qabyldanǵan sharalardyń, onyń ishinde jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 1,3 jumyskerdiń quqyqtary qorǵaldy. Olarǵa 355,3 mln teńge tólendi. Budan basqa, eńbek zańnamasynyń saqtalýyna memlekettik baqylaýdy qamtamasyz etý máseleleri QR Eńbek jáne halyqty áleýmettik qorǵaý mınıstrliginiń erekshe baqylaýynda, — delingen vedomstvo habarlamasynda.
2025 jylǵy 1 mamyrdaǵy derekter boıynsha memlekettik eńbek ınspektorlary 1 891 tekserý júrgizdi, onyń barysynda 2 338 buzýshylyq anyqtaldy, onyń ishinde: eńbek salasynda — 1 920; eńbek qaýipsizdigi jáne eńbekti qorǵaý boıynsha — 401; halyqty jumyspen qamtý boıynsha — 17.
Qabyldanǵan sharalardyń nátıjesinde 13,8 myń jumyskerdiń eńbek quqyǵy qorǵaldy.
Osyǵan deıin Eńbek jáne halyqty áleýmettik qorǵaý vıtse-mınıstri Asqarbek Ertaev shetelge jumys isteýge ketetin qazaqstandyqtardyń quqyǵyn qorǵaý boıynsha qabyldanyp jatqan sharalar týraly aıtyp berdi.