Respýblıka boıynsha 125 temirjol vokzaly jóndeledi – vıtse-mınıstr
AQTÓBE. KAZINFORM – Elimiz boıynsha 125 vokzal jóndeledi. Sonymen birge bıyl 226 vagon jańarady.
QR Kólik vıtse-mınıstri Sátjan Ablalıev Aqtóbe oblysynyń turǵyndarymen kezdesý ótkizedi. Avtojol, temirjol jáne áýe qatynasyndaǵy jumystar men aldaǵy jospardy bólisti.
— Byltyr jolaýshylar tasymaly 7 paıyzǵa ósti. Onyń ishinde Aqtóbe oblysynyń úlesi de kóp. Barlyǵy 20 mln jolaýshy tasymaldansa, onyń mıllıonǵa jýyǵy osy Aqtóbe oblysynda eken. Endi osy úrdis jalǵasady. Jaz kezinde vagon sany barynsha kóbeıip jatyr. 19-21 vagonǵa deıin arttyrady. Vagondardyń jaǵdaıy boıynsha kóp áńgime bolady. Elimizde temirjol salasynda jolaýshylar tasymaldaıtyn 2600 vagon bolsa, onyń 42 paıyzy eskirgen, bolmasa 30-40 jyldan beri qoldanysta. Ony jańartý kezeń-kezeńimen júzege asady. Bıyltyr 143 vagon satyp alǵan. Bıyl 226 vagon alady. Elimizde vagon shyǵarý zaýyttary iske qosylǵany belgili. Ol Petropavldaǵy zaýyt, sonymen birge nemis kompanııasy Astanada qurylysyn bastap jatyr. Bıyl birinshi vagondaryn bizge beredi, - dedi QR Kólik vıtse-mınıstri Sátjan Ablalıev.
Sóıtip 2030 jylǵa qaraı vagonnyń 80 paıyz jańartý josparda bar. Sonymen birge bıyl elimizde temirjol vokzaldary jóndeledi.
— Elimizde kóp jyldan beri temirjol vokzaldaryna jóndeý, kúrdeli jóndeý júrgizilmedi. Soǵan baılanysty mınıstrlik Úkimet qoldaýymen úlken sharany qolǵa aldy. Respýblıka boıynsha 125 vokzaldyń jóndeý jumysyn bir mezgilde bastap, bir jylda aıaqtaý josparlanyp otyr. Aldaǵy aptada jóndeý bastalady. Onyń ishinde Aqtóbe oblysynda 7 vokzal tizimge kirdi, - dedi QR Kólik vıtse-mınıstri.
Eske salsaq, Qyzylorda oblysyndaǵy ǵasyrdan astam tarıhy bar vokzal jóndeledi.