Respýblıka azamatynyń negizgi quqyqtary men mindetteri Konstıtýtsııada anyq tujyrymdalǵan - Marat Báshimov

ASTANA. Tamyzdyń 24-i. QazAqparat - Taǵdyrymyzben tamyrlas, tarıhymyzben taǵdyrlas taý sýyndaı aryndy da sarqylmas qudiretti kúsh bar, ol - ultjandylyq pen otansúıgishtik. Otansúıgishtik halyqtyń tálim-tárbıelik dástúrge júrgizilgen ulttyq tárbıe negizinde qalyptasyp tektilikke jetkizer rýhanı kúsh, adam men qoǵamnyń alǵa qoıǵan ortaq maqsattaryna qol jetkizer kıeli qasıet. Táýelsizdik belgilerin qadirleý, maqtanysh tutý bizdiń basty mindetimiz! Elimizdiń rámizderi, Konstıtýtsııa Qazaqstan azamatynyń eline, halqyna, jerine, memleketine degen úlken syı-qurmetin oıatady.

Astana qalalyq Іshki ister departamentinde QR Prezıdenti janyndaǵy adam quqyǵy boıynsha komıssııa sarapshysy, «Adam jáne zań» gazetiniń bas redaktory, zań ǵylymdarynyń doktory, professor Marat Báshimovtyń elordalyq garnızon jeke quramymen kezdesýi ótkizildi, dep habarlaıdy Astana qalalyq ІІD baspasóz qyzmetiniń jetekshisi Nurdildá Oraz.

Kezdesý barysynda Marat Sovetuly jeke quramǵa Konstıtýtsııanyń adam ómirindegi mańyzy týraly aıta kelip: «Respýblıka azamatynyń negizgi quqyqtarymen qatar mindetteri de 1995 jylǵy tamyzdyń 30-ynda búkilhalyqtyq talqylaýdan ótip qabyldanǵan Konstıtýtsııada anyq tujyrymdalǵan.

Adam týmysynan ózine qajetti quqyqtar men bostandyqtarǵa ıe. Al ol óz memleketiniń azamattyǵyn alǵannan keıin azamattyq quqyqtarǵa ıe bolyp, tıisti mindetterdi qosa atqarýǵa tıis. Konstıtýtsııada adamdy qasterleý, qurmetteý, adamgershilik sezimderine úlken mańyz berilgen. Árkimniń óziniń jeke basynyń bostandyǵy zań júzinde qorǵalǵan. Zań boıynsha adamnyń jeke basynyń qadir-qasıetine qol suǵylmaıdy.

Konstıtýtsııanyń 19-babynda "Árkimniń óziniń qaı ultqa, qaı partııaǵa jáne qaı dinge jatatynyn ózi anyqtaýǵa jáne ony kórsetý-kórsetpeýge haqyly" dep jazylǵan. Adamdardyń ar-ojdan bostandyǵyna zań júzinde tolyq kepildik berilgen», - dedi.