Respýblıka azamaty: Jetisýlyq bir áýlettiń temirjol salasyndaǵy eńbek ótili – 347 jyl
TALDYQORǴAN. KAZINFORM - Jetisý oblysy Qaratal aýdanyndaǵy Ábishevter áýletiniń toǵyz ókiliniń temirjol salasyndaǵy jalpy eńbek ótili 347 jylǵa jetedi. Bir áýlettiń birneshe býyny osy salany tańdap, ómir boıy temirjolda eńbek etip keledi.
Solardyń biri – áke jolyn jalǵap, ǵumyrynyń 44 jylyn temirjolǵa arnaǵan Svetlana Ábishova. Ol otbasynda qalyptasqan eńbek dástúri týraly áńgimeledi.
Ábishevter áýletiniń temirjoldaǵy tarıhy Naýryzbaı Ábishevten bastalady. Ol 1934 jyly dúnıege kelgen. Eńbek jolyn nebári 14 jasynda temirjoldan bastaǵan Naýryzbaı Ábishev jyldar óte jol monterinen brıgadır, jol sheberi, stantsııa kezekshisi jáne stantsııa bastyǵy qyzmetterine deıin kóterildi. Temirjol salasynda 60 jasyna deıin eńbek etip, ǵumyrynyń basym bóligin osy kásipke arnady.
Naýryzbaı Ábishevtiń qyzy Svetlana kópbalaly otbasynda ósti. Anasy Tashen Ábishova bala tárbıesimen aınalyssa, ákesi kún saıyn jumysqa asyǵatyn. Temirjoldaǵy tirshilik Svetlananyń bala kezinen kóz aldynda ótti. Ákesiniń óz isine degen jaýapkershiligi men eńbekke adaldyǵy onyń mamandyq tańdaýyna da áser etti.
— Ákem ómir boıy temirjolda jumys istedi. Biz kópbalaly otbasynda óstik. Anamyz bala tárbıesimen aınalysty, al ákem jol monteri bolyp eńbek etti. Bala kezimnen onyń jumysynyń qanshalyqty jaýapty ekenin kórip óstim. Sol kezden bastap osy mamandyqqa qurmetim qalyptasqan shyǵar, — dep eske alady Svetlana Ábishova.
1984 jyly Almatydaǵy №48 kásiptik-tehnıkalyq ýchılışeni bitirgen Svetlana eńbek jolyn Úshtóbe stantsııasynda baqylaý beketiniń operatory bolyp bastady. Keıin park kezekshisi, operator, stantsııa kezekshisiniń kómekshisi qyzmetterin atqardy. 1997 jyldan bastap stantsııa kezekshisi bolyp jumys istedi.
Stantsııa kezekshisiniń jumysy úlken jaýapkershilik pen muqııattylyqty talap etedi. Ol poıyzdardyń qozǵalysyn baqylap, sıgnaldardy qadaǵalaıdy, áriptesterimen baılanysta bolyp, qajetti sheshimderdi ýaqytynda qabyldaýy kerek. Jolaýshylar úshin poıyzdyń kelýi men jóneltilýi qalypty kóringenimen, onyń artynda qozǵalys qaýipsizdigin qamtamasyz etetin mamandardyń tynymsyz eńbegi jatyr.
— Temirjolda alańdaýǵa bolmaıdy. Únemi muqııat bolyp, jaǵdaıǵa jyldam áreket etip, mindetterińdi naqty oryndaý qajet. Biz aýysymmen jumys isteımiz, demalys jáne mereke kúnderi de qyzmet atqaramyz. Soǵan qaramastan, men óz mamandyǵymdy árdaıym jaqsy kórdim. Kóp nárse ujymǵa baılanysty. Barlyǵy birlese, úılesimdi jumys isteýi kerek, — deıdi Svetlana Ábishova.
Svetlana temirjolda 44 jyl eńbek etip, mol tájirıbe jınaqtady. Onyń kásibı jolynyń basym bóligi Úshtóbe stantsııasynda ótti. Munda ol qozǵalys qaýipsizdigine ortaq jaýapkershilikpen qaraıtyn áriptesterimen birge qyzmet atqardy. Búginde zeınet demalysynda júrgenimen, onyń eńbek joly Ábishevter áýletiniń temirjol tarıhynyń bir bóligine aınaldy.
Bul áýlette temirjol mamandyǵyn tańdaǵandar az emes. Naýryzbaı Ábishevtiń jolyn Svetlananyń úsh baýyry – Danııar, Madııar jáne Madımar da jalǵastyrdy. Olardyń árqaısysy salada uzaq jyldar eńbek etken. Danııardyń eńbek ótili – 37 jyl, Madııardiki – 40 jyl, al Madımardiki – 45 jyl.
Baýyrlarynyń jubaılary da temirjol salasynda qyzmet etti. Madımardyń áıeli Raýshan osy salaǵa 40 jylyn arnasa, Madııardyń jubaıy Nazımanyń eńbek ótili 35 jylǵa jetken.
Svetlananyń jubaıy Murat Baıbolovtyń da eńbek joly temirjolmen tyǵyz baılanysty. Ol osy salada 39 jyl jumys istep, 2021 jyly zeınetke shyqty. Osylaısha, temirjol Ábishevter otbasy úshin birneshe urpaqty baılanystyratyn ortaq kásipke aınaldy.
Otbasylyq dástúrdi jalǵastyrǵandardyń qatarynda Svetlananyń uly Nurlan Baıbolov ta bar. Ol 2004 jyly Almatydaǵy Qazaq kólik jáne kommýnıkatsııalar akademııasyn bitirip, temirjol salasyna jumysqa ornalasty. Qazir Úshtóbe stantsııasynda kezekshi bolyp qyzmet etedi. Saladaǵy eńbek ótili – 21 jyl.
— Men de mamandyq tańdaǵanda kóp oılanǵan joqpyn. Temirjolda ár adamnyń eńbegi mańyzdy. Jolshylardyń, mashınısterdiń, baılanysshylardyń jáne stantsııa kezekshileriniń árqaısysy óz mindetin atqarady, — deıdi Nurlan Baıbolov.
Nurlan atasy men ákesiniń jolyn jalǵastyrdy. Svetlananyń baýyrlarynyń balalary da temirjol salasynda eńbek etip júr. Sóıtip, Naýryzbaı Ábishev bastaǵan dástúr birneshe býynǵa jalǵasty.
Áýlettiń toǵyz ókiliniń eńbek ótilin qosqanda, jalpy kórsetkish 347 jylǵa jetedi. Olardyń qatarynda Naýryzbaı Ábishev, Svetlana Ábishova, onyń jubaıy Murat Baıbolov, úsh baýyry, baýyrlarynyń eki jubaıy jáne uly Nurlan bar. Bul – jaı ǵana san emes, ondaǵan jyl boıy atqarylǵan adal eńbektiń, jınaqtalǵan tájirıbe men úlken jaýapkershiliktiń kórinisi. Onyń ústine, temirjolda eńbek etip júrgen áýlet músheleri munymen shektelmeıdi.
Ábishevter otbasynyń tarıhy mamandyq tańdaýda otbasylyq tárbıeniń de mańyzy zor ekenin kórsetedi. Naýryzbaı Ábishevtiń eńbekke degen adaldyǵy balalaryna úlgi boldy. Qyzy áke jolyn jalǵastyrsa, nemereleri de osy saladan óz ornyn tapty.
347 jyldyq eńbek ótili – temirjoldy jaı ǵana jumys orny emes, áýlettiń ómirlik tańdaýyna aınaldyrǵan birneshe býynnyń tarıhy. Olardyń árqaısysy óz mindetin abyroımen atqaryp, ortaq iske úles qosty. Búginde Jetisýdan shyqqan temirjolshylar áýleti aǵa býynnyń jolyn jalǵap, kásibı dástúrdi keıingi urpaqqa jetkizip keledi.
Eske salsaq, buǵan deıin áke jolyn jalǵaǵan ormanshy týraly jazǵan bolatynbyz.
