Respýblıka azamaty: temirjolshylar áýletiniń tórtinshi býyny Janar Berkenovanyń ómir joly
ALMATY. KAZINFORM — Temirdeı tártipti talap etetin temirjol salasynyń tynys-tirshiligin júrekpen túsinip, tabandy eńbegimen ónege kórsetip júrgen jannyń biri — «Qazaqstan temirjoly» UK» AQ Kópsalaly qyzmet kórsetý ortalyǵynyń kadrlyq-ákimshilik departamentiniń menedjeri Janar Berkenova.
Kókshetaýdan bastaý alǵan eńbek joly
Kókshetaý týmasy Janar Orynbaıqyzynyń bul salany tańdaýy kezdeısoqtyq emes. Qazaq halqy «Ata óneri — balaǵa mura» degendeı, ómir jolyn temirjolmen baılanystyrý — atadan qalǵan joldy sanaly túrde jalǵaýy.
— Men temirjolshylar dınastııasynan bolamyn. Arǵy atam — Aıdarhan Jumahanov, óz atam Serikbaı Aıdarhanov jáne ájem Kúlzada Aıdarhanova, ákem Orynbaı Aıdarhanov ta temirjol salasynda eńbek etken. Olardyń barlyǵy Shaǵalaly stantsııasynda ártúrli qyzmeterdi atqarǵan. Mektep bitirgen soń, osy joldy tańdaýyma otbasylyq dástúr men áke ónegesi áser etti, — dedi keıipkerimiz.
Muhamedjan Tynyshpaev atyndaǵy Qazaq kólik jáne kommýnıkatsııa akademııasynan (red. — ALT University) bilim alǵan jas maman 2004 jyly eńbek jolyn týǵan qalasyndaǵy Kókshetaý júk tasymaldaý bólimshesinen bastaıdy. Bastapqyda hatshy bolyp qabyldanǵan ol keıin Kókshetaý stantsııasynda júk qabyldap-tapsyrýshy jáne taýar kassıri qyzmetterin abyroımen atqardy. Osylaısha óndiristiń qarapaıym baspaldaqtarynan ótip, salanyń qyr-syryn tereń meńgerip, aldymen Astanaǵa, keıin Almatydaǵy bólimshelerge aýysady. Búginde onyń saladaǵy eńbek ótili 23 jylǵa jýyqtaıdy. Al 1945 jyly Shaǵalaly stantsııasynda jumysyn bastaǵan keıipkerimizdiń úlken atasy Aıdarhan Jumahanovtan bastap eseptegende 80 jyldan asady.
«Temirjolda júrip jolyqtyq»
Janardyń ómirlik joldasy Renat Berkenov te osy salanyń ókili — ol búginde «QTJ» UK» AQ «Jobalaý-konstrýktorlyq bıýrosynyń» jobalar boıynsha izdestirý toby jetekshisiniń orynbasary. Ol bolashaq jubaıymen qyzmet babymen júrip, is-saparlardyń birinde — Býrabaıǵa bara jatqan poıyzda tanysqan. Renat ta jary sekildi temirjolshylar áýletinen shyqqan. Ol osy saladaǵy dısnastııanyń úshinshi býyny.
Ortaq kásip biriktirgen olar shańyraq kóterip, qazir eki bala tárbıelep otyr.
— Bir sala bolǵandyqtan, bir-birimizdi jaqsy túsinip, qoldaý kórsetemiz. Balalarymyz bolashaqta temirjol jolyn tańdasa, qarsy emespiz, biraq sheshim ózderinde bolady, — dep aǵynan jarylady Janar.
Jaýapkershilik pen mindet
Búginde Janar Berkenovanyń jumysy aımaqtaǵy fılıaldarmen tyǵyz baılanysta ótedi. QTJ qyzmetkerleriniń kadrlyq derekterin júıege engizip, qujattarmen jumys isteý úlken zeıin men jaýapkershilikti talap etedi.
— Qujatpen jumys bolǵan soń, óte muqııat bolý mańyzdy. Bizge kelgen ár ótinishtiń artynda naqty bir adam, onyń taǵdyry tur. Sondyqtan zańdy bilý jáne árbir qyzmetkerge janashyrlyqpen qaraý — basty qaǵıdam, — deıdi ol.
Óz jumysyna degen adaldyǵy úshin Janar Berkenova «Temirjol salasynda 20 jyl minsiz qyzmeti úshin» tósbelgisimen jáne «QTJ» UK» AQ Basqarma tóraǵasynyń qurmet gramotasymen marapattalǵan.
Zaman talabyna saı ózgerister
Shırek ǵasyrǵa jýyq ýaqyt boıy temirjol salasynyń damýyna kýá bolyp kele jatqan maman búgingi jańashyldyqtarǵa erekshe qýanady.
— Qazir temirjol salasyndaǵy ózgerister kóz qýantady. Jumystyń tsıfrlandyrylýy, avtomattandyrylýy — zaman talabyna saı qadam. Jańa poıyzdardyń jolǵa shyǵyp, jańa stansalardyń qoldanysqa berilip jatqanyn kórip júrmiz. Bul — el ekonomıkasynyń damýyna tikeleı áser etip qana qoımaı, qarapaıym jumysshylarǵa jasalyp jatqan jaǵdaıdyń aıǵaǵy, — dedi Janar Berkenova.
Ata kásibin ardaqtap, mańdaı terin tógip júrgen osyndaı bilikti maman men qarapaıym temirjolshylardyń qajyrly eńbeginiń arqasynda eldiń kólik júıesi turaqty túrde alǵa basyp keledi.
Eske salaıyq, Qazaqstanda aldaǵy úsh jylda 2,5 myń shaqyrym jańa temirjol salynady.
