Respýblıka azamaty: shymkenttik polıtsııa maıorynyń qyzmeti men ómirlik ustanymy

Bala kúngi armany ony polıtsııa qyzmetine qalaı alyp keldi, alǵashqy eńbek jyldary oǵan ne úıretti, nelikten ol marapattan góri kómek alǵan adamnyń alǵysyn joǵary baǵalaıdy? Osy suraqtarǵa Kazinform tilshisi jaýap izdep kórdi.

Generaldyń ústelindegi medaldar

Búginde 34 jastaǵy Ádemi Ábdirova Shymkent qalasy polıtsııa departamenti kóshi-qon qyzmeti basqarmasynyń aǵa ınspektory bolyp jumys isteıdi. Іshki ister organdaryndaǵy eńbek ótili 17 jyldan asady.

Ol bala kezinen polıtsııa qyzmetkeri bolýdy armandaǵan. Qylmysty ashyp, quqyq buzýshylardy ustap, adamdardy qorǵaıtyn jedel ýákilderdiń jumysyna qyzyqqan. Sportpen shuǵyldanyp, jarystarǵa qatysqan. Sport pen tártiptiń bolashaq mamandyǵyna qajet ekenin túsingen.

Ádeminiń mamandyq tańdaýyna atasy Muratbektiń yqpaly erekshe boldy. 2009 jyly mektep bitirgen nemeresin ol sol kezdegi Ońtústik Qazaqstan oblysy ishki ister organdarynyń basshysynyń qabyldaýyna ertip barǵan.

– Atamnyń paketten sporttyq medaldarymdy shyǵaryp, generaldyń aldyna qoıǵany áli esimde. «Nemerem polıtsııada qyzmet etýdi armandaıdy. Sportpen aınalysady, tártipti, boıy da uzyn. Oqýǵa túsýine kómektesińiz», – dedi. General bizdi muqııat tyńdap, atama jyly jaýap berdi, – dep eske alady ol.

Odan keıin medıtsınalyq komıssııadan, sporttyq synaqtardan jáne Almatydaǵy arnaıy irikteýden ótý kerek boldy. Ádemi barlyq kezeńnen súrinbeı ótip, Іshki ister mınıstrligine qarasty oqý ornyna qabyldandy.

2009-2011 jyldary kásibı bilim alǵan soń oǵan polıtsııa leıtenanty ataǵy berildi.

Alǵashqy reıdter jáne anasynyń sózi

Qyzmettiń alǵashqy kezeńi Ádemi oılaǵandaı bola qoıǵan joq. Ol qylmystyq izdestirý bólimine emes, Saıram aýdandyq polıtsııa bóliminiń kámeletke tolmaǵandar isteri jónindegi bólimshesine jiberildi.

Jas qyzmetkerge jasóspirimder arasyndaǵy quqyq buzýshylyqtyń aldyn alý, reıdterge shyǵý jáne kámeletke tolmaǵandarmen jumys isteý mindeti júkteldi.

Qyzmeti túnge deıin sozylyp, tańǵa deıin jalǵasatyn kezder de bolǵan. Uzaqqa sozylǵan reıdterden tańǵy saǵat beste ne altyda úıine oralyp, arada birer saǵat ótkende qaıtadan jumysqa shyǵýǵa týra keletin.

– Keıde úıge tańǵy beste-altyda keletinmin de, saǵat jeti jarymda qaıtadan jumysqa shyǵatynmyn. Anam únemi qoldap: «Sen óz mindetińdi atqaryp júrsiń. Bálkim, búgin bir balany úlken qaýipten aman alyp qalǵan shyǵarsyń», – deıtin. Bul sózder esimde máńgi qaldy. Maǵan kúsh berip, tańdaǵan mamandyǵymnan bas tartpaýǵa kómektesti, – deıdi Ádemi.

Alǵashqy eńbek jyldary oǵan túrli jaǵdaıǵa tap bolǵan adamdarmen til tabysýdy úıretti. Qyzmet barysynda sabyr saqtap, ár adamnyń máselesine túsinistikpen qaraýdyń qanshalyqty mańyzdy ekenin uǵyndy.

Ár qujattyń artynda adam taǵdyry tur

Qazir Ádeminiń negizgi jumysy azamattardyń qujattaryn rásimdeýmen baılanysty. Keıbir azamattar túrli sebeppen qajetti qujattaryn uzaq ýaqyt boıy ala almaı, kóshi-qon qyzmetine júginedi.

Mundaı máselelerdiń sheshimi árdaıym birdeı bola bermeıdi. Ár ótinishtiń artynda adamnyń jeke jaǵdaıy turady. Sondyqtan qyzmetkerler azamattyń máselesin muqııat zerdelep, zań talaptaryn túsindirip, óz quzyreti sheginde kómek kórsetýge tyrysady.

Ádemi úshin osyndaı jumystyń eń mańyzdy tusy – azamattyń máselesi sheshilip, qajetti qujatyn qolyna alýy.

– Uzaq ýaqyt áýrege túsip, aqyry qujatyn alǵan adamnyń qýanyshyn kórýdiń ózi erekshe áser beredi. Ol úshin bul jaı ǵana jeke kýálik emes, kúndelikti máselelerin sheship, óz quqyqtaryn paıdalanýyna múmkindik beretin mańyzdy qujat. Osyndaı sátter jumysymyzdyń mánin arttyrady, – deıdi polıtsııa maıory.

Onyń aıtýynsha, qujat máselesimen uzaq ýaqyt aınalysyp, aqyrynda úmitin úze bastaǵan azamattar da kezdesedi. Sondyqtan mundaı jaǵdaıda adamdy muqııat tyńdap, máseleniń mán-jaıyn anyqtap, zańdy sheshý joldaryn túsindirý mańyzdy.

– Adam aldymyzǵa máselesin aıtyp kelgende, ony tyńdap qana qoımaı, jaǵdaıyn túsinýge tyrysý kerek. Qandaı áreket jasaý keregin túsindirip, zań aıasynda kómektesý mańyzdy. Qujatyn alǵan soń shyn kóńilden alǵysyn aıtyp jatatyn sátter bolady. Sonda eńbegińniń bireýdiń ómirin jaqsy jaqqa ózgertýge yqpal etkenin sezinesiń. Ár qujattyń artynda adam taǵdyry turǵanyn umytpaýymyz kerek, – deıdi ol.

Ádemi kásibı jetistigin súıikti isine adal bolyp, qoǵamǵa paıda tıgizýmen baılanystyrady. Qyzmet barysynda talaı qıyndyqty eńserip, shydamdylyqqa úırengen. Al kómek surap kelgen azamattardyń senimin aqtaý – onyń basty mindetteriniń biri.

– Kómegim tıgen adamdardyń alǵysyn erekshe baǵalaımyn. Keıde shyn kóńilden aıtylǵan qarapaıym «raqmet» sózi kez kelgen marapattan artyq. Men úshin basty jetistiktiń biri – kóp jyldan beri tańdaǵan isime adal bolyp, adamdarǵa paıdamdy tıgizip kele jatqanym, – deıdi keıipkerimiz.

Ana, polıtsııa maıory jáne sportshy

Kóshi-qon qyzmetindegi jumys kásibı bilimmen qatar, sabyr men tózimdilikti de talap etedi. Kún saıyn túrli máselemen keletin azamattardyń bári birdeı zań talaptaryn túsine bermeıdi. Keıde qyzmetkerlerge narazylyq bildirip, aýyr sóz aıtatyndar da kezdesedi.

Ádemi mundaı jaǵdaıda emotsııaǵa berilmeı, máseleni túsindirýge tyrysady. Degenmen qyzmettiń óz qıyndyǵy bar ekenin jasyrmaıdy.

– Keıde azamattar alǵysyn aıtsa, keıde kóńilge tıetin sózder de estısiń. Munyń bári adamǵa áser etedi. Biraq sabyr saqtap, óz mindetińdi umytpaý mańyzdy. Keıde keshke deıin jumys isteýge, demalys kúnderi de qyzmetke shyǵýǵa týra keledi. Bul mamandyqty ózim tańdadym, sondyqtan jaýapkershiligin de sezinýim kerek. Qıyndyǵyna qaramastan, jumysymdy jaqsy kóremin, – deıdi polıtsııa maıory.

Qyzmetten keıin ony úıde balalary men kúndelikti tirlik kútedi. Ádemi otbasyna ýaqyt bólýge tyrysady, kelesi kúnge qajetti zattardy aldyn ala daıyndap qoıýdy ádetke aınaldyrǵan. Tyǵyz kestege qaramastan, bala kúninen serik bolǵan sportty da umytqan emes. Keıde jattyǵýǵa túski úzilis kezinde barady.

– Men polıtsııa qyzmetkeri ǵana emes, anamyn. Balalardy tárbıeleý de úlken jaýapkershilik. Osy eki mindetti qatar alyp júrý ońaı emes. Degenmen áıel adam kóp qıyndyqty eńsere alady dep oılaımyn. Balalarymnyń maǵan qarap boı túzegenin qalaımyn. Olar jumys kóp bolsa da, otbasyǵa, densaýlyqqa jáne ózin-ózi damytýǵa ýaqyt tabýǵa bolatynyn kórse deımin. Eń bastysy – nıet pen tártip, – deıdi ol.

Ádemi áleýmettik jelide de belsendi. Instagram paraqshasynda polıtsııa qyzmetkerleriniń kúndelikti ómiri, sporttaǵy jetistikteri men jeke tájirıbesi týraly málimettermen bólisip otyrady.

Ol arqyly polıtsııa qyzmetiniń kópshilik bile bermeıtin qyryn kórsetip, forma kıip júrgen adamdardyń jumystan tys ómiri de bar ekenin jetkizgisi keledi.

– Pogon taqqan adamnyń da otbasy, armany, qyzyǵýshylyǵy men ózindik ustanymy bar. Men osyny kórsetkim keledi. Mundaı oqıǵalar jastarǵa oı salyp, óz maqsatyna umtylýǵa yntalandyrsa deımin, – deıdi Ádemi.

Ádemini jigerlendiretin – balalary. Ol balalarynyń ózine senimdi bolyp ósip, qıyndyqtardan qaımyqpaı jáne maqsattaryna jete biletin azamat bolǵanyn qalaıdy.

– Balalaryma qıyndyqqa moıymaýdy, ózine senýdi jáne alǵa qoıǵan maqsatyna jetýdi óz úlgimmen úıretkim keledi, – deıdi ol.

Ádemi óz tájirıbesi arqyly jastardy polıtsııa qyzmetine ǵana emes, sportpen aınalysýǵa, shyǵarmashylyqqa, saıahattaýǵa jáne jańa bilim alýǵa da yntalandyrǵysy keledi.

– Ómir telefonǵa telmirýmen ǵana shektelmeıdi. Aınalamyzda múmkindik kóp. Sportpen aınalysýǵa, saıahattaýǵa, shyǵarmashylyqpen shuǵyldanýǵa, jańa nárse úırenip, jetistikke jetýge bolady. Jastarǵa bilimdi, maqsatshyl bolýdy jáne ár sheshimdi oılanyp qabyldaýdy tileımin. Jańa nárseni baıqap kórýden qoryqpaı, sportpen aınalysýǵa, bı bıleýge nemese ózine unaıtyn, damýyna kómektesetin basqa da paıdaly isterge ýaqyt bólgeni jón. Jaqsy men jamandy ajyrata bilip, jetistikke ońaı jolmen jetýge umtylmaǵan durys. Ómirde qıyndyqtar bolady, biraq solardy eńsergen saıyn shyńdala túsemiz. Eń bastysy – adamdyq qasıetti joǵaltpaı, óz kúshińe sený jáne armanyńnan bas tartpaý, – deıdi polıtsııa maıory.

Buǵan deıin «Respýblıka azamaty» aıdary aıasynda batysqazaqstandyq jas ǵalymnyń qus sharýashylyǵyn damytýǵa baǵyttalǵan ǵylymı izdenisteri týraly jazǵan edik.