Respýblıka azamaty: chempıon Davıd Degtıarev joly men sporttyq fılosofııasy
ALMATY. KAZINFORM – Adal eńbek etip, memleket pen qoǵamǵa beıjaı qaramaıtyn, kúndelikti ómirdegi jeke úlgisimen ózge otandastaryna ónege bolatyn azamattar el damýyna ólsheýsiz úlesip qosyp júrgeni sózsiz. Mindet pen maqsattan qashpaıtyn, eń kúrdeli jumystardy qolǵa alatyn mundaı adamdar bizdiń ortamyzda júr. Olardyń biri ári biregeıi - eki dúrkin Paralımpıada chempıony jáne Azııa Para oıyndarynyń jeńimpazy, paýerlıfter Davıd Degtıarev.
Davıd Degtıarev halyqaralyq arenadaǵy kóptegen jeńisterimen jáne temirdeı tártibimen adamnyń kúshi shekara bilmeıtinin dáleldep keledi. Al onyń ár jarys alańyna shyǵýy búkil el úshin erlik pen qaısarlyqtyń úlgisine aınalǵan.
Bıyl 19 qazan kúni Japonııada ótip jatqan Azııa Para oıyndarynda Davıd Degtıarev 54 kelige deıingi salmaq dárejesinde parapaýerlıftıngten altyn medal jeńip, Azııa Para oıyndarynyń jańa rekordyn ornatty.
Jarystaǵy ónerin baǵalaǵan sportshy bul nátıje - el Týyn kókke kóterip, Ánurandy shyrqaýǵa múmkindik bergendikten, kóńili tolatynyn atap ótti. Onyń aıtýynsha, alǵashqy eki kezeń jospar boıynsha ótken, alaıda úshinshi áreket sátsiz aıaqtaldy. Davıd munyń nelikten bolǵanyn ázirge aıta almaıtynyn jetkizip, jarystaǵy ónerine muqııat taldaý jasaý qajet ekenin basa aıtty.
— Ózimizdi kúshtirek, jaqsyraq etip daıyndap, kelesi joly nátıjemizdi jaqsarta túsemiz, — dep senimdi túrde málimdedi Davıd Degtıarev.
Chempıon úshin árbir marapattyń orny bólek, óıtkeni ár júldeniń artynda tógilgen ter men eńbek jatyr. Sol sebepti otandasymyz úshin Azııa Para oıyndarynyń altyny basqa jetistikterimen salystyrǵanda mańyzdyraq nemese mańyzy tómen emes. Degenmen sportshy 2016 jyly Kókshetaý qalasynda ótken «Úmit» spartakıadasynda jeńip alǵan medaliniń orny bólek ekenin jasyrmady. Óıtkeni bul onyń eń alǵashqy jarysy edi.
Sportshy óz jetistikterin árdaıym týǵan jerimen tyǵyz baılanystyrady.
— Búgingi jeńisimdi Otanym — Qazaqstanǵa arnaımyn, - dedi ol.
Búginde Davıd Degtıarev — Qazaqstannan shyqqan tuńǵysh ári jalǵyz eki dúrkin Paralımpıada chempıony, parapaýerlıftıngten úsh dúrkin álem chempıony jáne Azııa Para oıyndarynyń eki dúrkin chempıony.
Mundaı joǵary nátıjelerge qaramastan, sporttyq mansabyn ári qaraı jalǵastyrýǵa eń aldymen sportshyǵa otbasy kúsh-qýat beredi. Oǵan qosa bapkeri de ýaqyt ótken saıyn onyń qol qýsyryp bos otyrýyna jol bermeıdi. Chempıonnyń aıtýynsha, sport — bul tek fızıkalyq turǵydan ǵana emes, ishki oı-sezim turǵysynan damýǵa, basqa elderge saıahattaýǵa, jańa tanystar taýyp, ómirden jańa maqsattar tabýǵa berilgen tamasha múmkindik.
Davıd Degtıarev shetelde Qazaqstan Týy kóterilip jatqanyn kórgende maqtanysh, jaýapkershilik jáne eli úshin qýanysh sezimin bastan keshetinin atap ótti. Ol muny árbir adam sezinýge tıis keremet sezim dep ataıdy. Sonymen qatar 2021 jyly Tokıoda ótken alǵashqy Paralımpıadaǵa qatysýy - oǵan artynda táýelsiz jáne kúshti Qazaqstan turǵanyn erekshe sezinýge múmkindik bergen.
— Men týǵan elimniń, otbasymnyń, jaqyndarymnyń orasan zor qoldaýyn sezinip, jeńiske jetýdiń qanshalyqty keremet ekenin túsindim, — dep eske alady sportshy.
Búginde ataǵy jer jarǵan chempıon óz aldyna tek sporttyq rekordtar ornatýdy ǵana emes, qoǵamǵa qyzmet etýdi de basty mindet sanaıdy. Ol óskeleń urpaqqa baǵdar kórsetetin tulǵa bolýǵa umtylady.
Eske salaıyq, Beksultan Qulmyrza dzıýdodan Azııa Para oıyndarynda top jardy.
