Respýblıka azamaty: aýyldastaryna kómektesetin Galına nege qalaǵa kóshkisi kelmeıdi
ASTANA. KAZINFORM – Qostanaı oblysynyń turǵyny Galına Zemlıanova aýyldaǵy úlken kisilerge elektrondy qyzmetterdi paıdalanýǵa kómektesip júr. Qazaq tilin bala kezinen úırengen ol aýylda da eńbek etip, jaqsy ómir súrýge bolatynyna senedi. Týǵan jerinen jyraqqa ketýdi qalamaıtyn, qolynan kelgen kómegin eshkimnen aıamaıtyn Galınanyń ómir joly – Kazinform materıalynda.
Týǵan jerge týyńdy tik
Galına Zemlıanova Qostanaı oblysy Naýryzym aýdanynyń Sholaqsaı aýylynda dúnıege kelgen. 2017 jyly aýdan ortalyǵy Qarameńdige qonys aýdaryp, sodan beri osynda turyp, eńbek etip keledi.
Galına úshin aýylda qalý – amalsyzdyqtan týǵan sheshim emes. Ol týǵan jerinen alystaǵysy kelmeıdi. Óıtkeni kindik qany tamǵan mekeni de, jaqyndary men úırengen ortasy da ózine ystyq.
– Men aýylda týyp-óstim. Sondyqtan bolar, aýyl maǵan erekshe jaqyn. Bul – meniń týǵan jerim. Balalarym da týǵan jerin qurmettep, salt-dástúrdi qadirleıtin, elin súıetin azamat bolyp ósse deımin. «Týǵan jerge týyńdy tik» deıdi ǵoı. Ózim de adamdarǵa paıdamdy tıgizip, kórgen jaqsylyǵymdy ózgelerge qaıtarǵym keledi, – deıdi Galına.
«Galıaǵa baryńyz, ol kómektesedi»
Galına aýyldaǵy «Dostatok» dúkeninde satýshy bolyp jumys isteıdi. Aptasyna alty kún tańǵy toǵyzdan keshki jetige deıin eńbek etedi. Alaıda aýyldastary ony tek dúkendegi satýshy retinde ǵana tanymaıdy. Elektrondy qyzmetterdi paıdalana almaı qınalǵandar da Galınaǵa júginedi.
Ol zeınetkerlerge eGov portalyn paıdalanýǵa, túrli qosymshalarǵa tirkelýge, qajetti qyzmetterdi alýǵa kómektesedi. Sondaı-aq Beeline ortalyǵymen birlesip, aýdan turǵyndaryna SIM-kartalaryn tirkeýge jáne aýystyrýǵa járdemdesedi. Sonyń arqasynda adamdar bul qyzmetter úshin qalaǵa sabylmaıdy.
Galınanyń aıtýynsha, qazir kóp sharýany úıden shyqpaı-aq telefon arqyly bitirýge bolady. Biraq jańa tehnologııany meńgerý úlken kisilerge ońaı emes.
– Qazir tipti dári alý úshin QR-kod qajet bolatyn jaǵdaılar bar. Zeınetkerlerdiń bári birdeı smartfondy paıdalana almaıdy. Qosymshalar jıi jańarady, talaptar ózgeredi. Keıde bıometrııalyq tekserýden ótý kerek. Munyń bári qarttarǵa qıyn. Sondyqtan qolymnan kelgenshe kómektesemin, – deıdi ol.
Galına densaýlyǵyna baılanysty úıinen shyǵa almaıtyn adamdardy da umytpaıdy. Qajet bolsa, olardyń úıine ózi barady.
– Birde birinshi toptaǵy múgedektigi bar zeınetkerge kómektestim. Ol ózi kele almady. Sondyqtan úıine bardym. Osyndaı adamdarǵa «Kómek kerek bolsa, habarlasyńyzdar, ózim baramyn» dep aıtamyn. Keıde bir ret kómektesý jetkiliksiz. Qosymshaǵa qaıta kirý, tirkelý nemese málimetterdi rastaý qajet bolyp jatady, – deıdi Galına.
Negizinde, Galına elektrondy memlekettik qyzmet kórsetetin mekemede jumys istemeıdi. Aýyldastaryna óz erkimen kómektesedi. Jumys berýshisi de onyń bul isine túsinistikpen qaraıdy.
Alǵashynda oǵan tanystary ǵana júginse, qazir kómekke muqtaj basqa turǵyndar da izdep keledi. Aýyldastary elektrondy qyzmetterdi paıdalana almaı júrgen adamdarǵa Galınaǵa barýǵa keńes beredi.
– Adamdar bir-birine «Galıaǵa baryńyz, ol «Dostatok» dúkeninde jumys isteıdi, kómektesedi» dep aıtady eken. Bul – olardyń maǵan senetininiń belgisi, – deıdi ol.
Qazaq tilin alty jasynan úırengen
Galına qazaq tili men ulttyq dástúrlerge bala kezinen qyzyǵady. Alty jasynan bastap qazaq tilin úırengen. Buǵan ósken ortasy da áser etken. Bala kúninen qazaq dostary kóp bolǵandyqtan, tildi solarmen aralasyp júrip meńgere bastaǵan.
– Maǵan qazaqtyń salt-dástúri, dúnıetanymy, adamdardyń bir-birine degen syılastyǵy men aýyzbirshiligi unaıdy. Dostarymnyń kóbi – qazaqtar. Olarmen qazaqsha sóılesemin. Bir sózdi qate aıtsam, túzetip otyrady. Osylaısha qazaq tilin jetildirip júrmin, – deıdi Galına.
Onyń aıtýynsha, kúndelikti qazaqsha sóılesý ońaıyraq. Al ádebı tildegi kúrdeli sózder men resmı qujattardyń tilin túsiný qıyndaý. Degenmen qazaqsha jıi sóılesý tilin jetildirýge kómektesedi.
Galına til úırený klýbyna da qatysady. 2023 jyly túrli ult ókilderi arasynda ótken qazaq tilin bilý baıqaýynda birinshi oryn alǵan.
Eń úlken jetistigim – eki balam
Galınany anasy jalǵyz tárbıelegen. Otbasynyń jaǵdaıyna baılanysty kezinde oqýǵa túsip, memlekettik mekemege jumysqa ornalasýǵa múmkindigi bolmapty. Soǵan qaramastan ol bilimin óz betimen tolyqtyryp, túrli baǵdarlamalardy meńgergen.
– Keıde menen «Nege oqýǵa túspediń? Nege memlekettik mekemege jumysqa ornalaspadyń?» dep suraıdy. Ol kezde ondaı múmkindigim bolmady. Meni anam jalǵyz ósirdi. Biraq men kóp kitap oqydym, qazir de oqımyn. Túrli baǵdarlamalardy óz betimshe úırenemin. eGov portalyn, «QazAgroQarjy» baǵdarlamalaryn, baılanys qyzmetterin jaqsy bilemin. Bireý túsinbeı jatsa, maǵan jiberedi, – deıdi ol.
Galına úshin eń úlken jetistik – jańa tehnologııalardy meńgerýi de, aýyldastarynyń alǵysyna bólenýi de emes. Ol bárinen buryn eki balasyn maqtan tutady.
– Meniń eń úlken jetistigim – eki balam. Ekeýin de óz kúshimmen ósirip, tárbıelep jatyrmyn. Olardyń jaqsy adam bolyp óskenin qalaımyn. Sol úshin barymdy salyp júrmin, – deıdi Galına.
Jastar nege aýyldan ketip jatyr?
Galına aýyldy jaqsy kórgenimen, ondaǵy qıyndyqtardy da biledi. Ásirese jastardyń qalaǵa kóshýi ony alańdatady. Onyń oıynsha, jastar aýyldan tek jumys izdep ketpeıdi.
– Jastardyń bári birdeı egin dalasynda nemese sharýa qojalyqtarynda jumys istegisi kelmeıdi. Kóbi qalaǵa umtylady. Múmkin, qalada kóńil kóteretin, bos ýaqytty ótkizetin oryndar kóp bolǵandyqtan shyǵar. Al bizde jastardyń jumystan keıin baryp demalatyn, aralasatyn jerleri az. Sondyqtan keıbirine aýyl ómiri qyzyqsyz kórinedi, – deıdi ol.
Soǵan qaramastan Galına aýyldyń bolashaǵyna senedi. Onyń aıtýynsha, aýyl sharýashylyǵy eldi azyq-túlikpen qamtamasyz etýde mańyzdy oryn alady. Egin egip, mal ósirip júrgen adamdardyń eńbegi búkil elge qajet.
– Jastarǵa aıtarym, qala aýyldan bastalady. Aýylda traktorshylar, dıqandar eńbek etedi, mal sharýashylyǵy damyp jatyr. Munyń bári óte mańyzdy. Eger jastar aýyl sharýashylyǵyn damytyp, óz kásibin ashyp, otandyq óndirýshilerdi qoldasa, aýyldarymyz da kórkeıe túsedi, – deıdi Galına.
Jasaǵan jaqsylyǵyń ózińe qaıtady
Galına aptasyna alty kún jumys istep, eki balasyn tárbıelep otyr. Soǵan qaramastan aýyldastaryna kómektesýge ýaqyt tabady. Osynsha sharýanyń arasynda ózgelerge nege kómektesip júrgenin suraǵanymyzda, ol qysqa ǵana jaýap berdi.
– Men jaqsylyqqa senemin. Bireýge kómektesseń, jasaǵan jaqsylyǵyń basqa adamdar arqyly ózińe qaıtady. Buryn da solaı bolǵan, aldaǵy ýaqytta da solaı bolady dep senemin, – deıdi ol.
Buǵan deıin aýyr jol apatynan keıin sportqa qaıta oralyp, álem chempıonattarynda júlde alǵan qazaqstandyq frıstaılshy Anastasııa Gorodko týraly jazǵan edik.
