Respýblıka azamaty: Anastasııa Gorodko aýyr jaraqattan keıin álemdik arenaǵa qalaı oraldy
ALMATY. KAZINFORM – Qazaqstannyń damýyna beıjaı qaramaıtyn, óz isine adal, talantymen jáne tabandy eńbegimen ózgelerge úlgi bolatyn azamattar eldiń órkendeýine úles qosyp keledi. Solardyń biri – Shyǵys Qazaqstan oblysynan shyqqan frıstaılshy Anastasııa Gorodko. Aýyr synaqtan keıin sportshy qarly betkeıge qaıta oralyp, qıyndyqty eńserý arqyly qaısarlyǵyn kórsetti. Búginde ol álemdik mogýl dodalarynda úzdikter qatarynan kórinip júr.
Anastasııa sportqa bes jasynda keldi. Alǵash ret anasy ony frıstaıl-mogýl sektsııasyna alyp kelgen. Jas sportshynyń alǵashqy jattyqtyrýshysy – Vıktor Reıherd. Keıin onyń daryny ulttyq qurama sapynda shyńdala tústi.
Anastasııanyń aıtýynsha, bala kezinde sportpen aınalysýǵa degen erekshe yntasy bolmaǵan. Anasy ony sektsııaǵa aparǵan, al ýaqyt óte kele sport onyń ómiriniń bir bóligine aınaldy. Sebebi jattyqtyrýshylar onyń jetistikterin baıqap, bolashaǵyna úmit artty.
Sportshynyń ózi de osy ýaqytqa deıin jumsaǵan eńbegin qımaı, sportty jalǵastyrdy. Osylaısha, balalyq shaqtaǵy ermegi birtindep ómiriniń mańyzdy bóligine aınaldy.
– Mogýl men úshin jaı ǵana balalar sektsııasy emes. Men bul sport túrin, onyń erekshe áseri men maǵan beretin adrenalınin jaqsy kóremin, – deıdi Anastasııa Gorodko.
Qazaqstannyń frıstaıl-mogýl quramasynyń bas keńesshisi Elena Krýglyhınanyń aıtýynsha, Anastasııa bala kezinen-aq márege birinshi bolyp jetýge umtylǵan. Ol jeńis úshin ne isteý keregin kóp oılamaı, bar yntasymen alǵa jyljyǵan.
Jattyqtyrýshy jas sportshymen jumys isteý qyzyq bolatynyn birden túsingen. Qyz jattyǵýlarǵa muqııat qatysyp, únemi kóterińki kóńil kúıde júrgen, bapkerleriniń aıtqanyn tyńdap, tájirıbeli sportshylardyń tálimin boıyna sińirýge tyrysqan. Sonymen birge Elena Krýglyhına Nastıanyń ózgege eliktemeı, óz bolmysyn qalyptastyrǵanyn aıtady.
Anastasııanyń ózinen de kimdi úlgi tutatynyn suraǵanda, «ózim» dep jaýap beredi.
Sportshy qyz 2021 jyly Almatyda ótken eresekter arasyndaǵy álem chempıonatynda qola medal jeńip alyp, ózin álemdik deńgeıde tanytty. 2022 jyly Beıjińde ótken qysqy Olımpıada oıyndaryna qatysyp, fınal-1 kezeńine bir qadam jetpeı qaldy. Sol maýsymda jasóspirimder arasyndaǵy álem chempıonatynda bir altyn jáne eki kúmis medal ıelendi.
Alaıda osy jetistikterden keıin jas sportshy aýyr synaqqa tap boldy. Týǵan jeri Shyǵys Qazaqstanda mototsıklmen kele jatqanda, Anastasııa jeńil kólikpen soqtyǵysyp, jol apatyna ushyrady. Apat saldarynan jambas súıegi synyp, baltyryndaǵy baılamdary úzildi. Jaraqatyna baılanysty ol 2022/2023 jylǵy maýsymdy tolyǵymen ótkizip aldy.
Aldymen Qazaqstanda shuǵyl ota jasaldy. Keıin Germanııada taǵy bir hırýrgııalyq ota jasaldy. Osydan soń uzaq ońaltý kezeńi bastaldy.
2019–2026 jyldary eki olımpıada kezeńinde Qazaqstan quramasynyń bas jattyqtyrýshysy bolǵan Elena Krýglyhına sol qıyn ýaqytta sportshyǵa qoldaý kórsetip, ony jalǵyz qaldyrmaý jáne aýyr synaqty eńserýine kómektesý mańyzdy bolǵanyn aıtady.
Jattyqtyrýshynyń sózinshe, Nastıa buryn-sońdy shańǵy jolynan qoryqpaǵan. Alaıda apattan keıin aq tústi kólikterden úreılenetin bolypty. Bastan ótkergen jaǵdaı onyń erte eseıýine áser etip, ómirge jáne aınalasyndaǵy adamdarǵa degen kózqarasyn ózgertken. Anastasııanyń ózi de sol kezeńde kóp nárseni qaıta oı eleginen ótkizgenin aıtady.
– Bul jaǵdaı meni tulǵa retinde qatty ózgertti. Ómirge burynǵydaı beıqam qaramaıtyn boldym, psıhologııalyq turǵydan kúsheıdim, – deıdi sportshy.
Elena Krýglyhına shákirtiniń sportqa qaıta oralatynyna eshqashan kúmándanbaǵan.
– Shańǵyǵa qaıta oralatynymyzǵa esh kúmánim bolǵan joq. Bul senim Nastıanyń ǵana emes, aınalasyndaǵy adamdardyń da jigerin nyǵaıtýǵa kómektesken shyǵar. Keıin ol ózine kimderdiń kómekteskenin bildi. Men oǵan báriniń qalaı bolǵanyn, onyń qaıta oralýy úshin kimniń ne istegenin aıtyp berdim. Tek oǵan senbegen adamdar týraly aıtpadym, óıtkeni onsyz da qıyn jaǵdaıdy odan ári aýyrlatqym kelmedi. Komandada da durys ahýal qalyptastyrý mańyzdy boldy. Nastıa birde-bir oqý-jattyǵý jıynynan qalǵan joq, biz ony ózgelerden bólip qarastyrmadyq. Onyń aldynda basqa jumys, basqa mindet turǵanyn túsindirdik, – dep eske aldy Elena Krýglyhına.
Germanııada uzaq ýaqyt emdelip, ońaltýdan ótken Anastasııa 2023/2024 jylǵy maýsymda shańǵy jolyna qaıta shyqty. Italııada ótken jasóspirimder arasyndaǵy álem chempıonatynda jeke mogýl saıysynda altyn, parallel mogýlda kúmis medal jeńip aldy. Sol kezde sportshy jaraqaty endi mazalamaıtynyn aıtqan.
Elena Krýglyhınanyń aıtýynsha, qazir quramada aǵa býyn men jas sportshylar arasyndaǵy sabaqtastyqty qalyptastyrýǵa erekshe kóńil bólinedi. Jasyna nemese jetistikterine qaramastan, sportshylar bir zalda, bir ýaqytta jattyǵady. Mundaı tásil ortaq komandalyq rýhty nyǵaıtyp, jas sportshylardyń álemdik frıstaıl juldyzdaryna qarap boı túzeýine, sol deńgeıge jetýge umtylýyna múmkindik beredi.
Qazirgi qurama kóshbasshylarynyń ózderi de kezinde tájirıbeli sportshylardyń qoldaýyn kórgen. Olarǵa ıÝlııa Galysheva, Dmıtrıı Reıherd jáne basqa da aǵa býyn ókilderi kómektesken. Endi olar ózderi jınaǵan tájirıbesin keıingi tolqynmen bólisip, jas frıstaılshylarǵa keńes aıtyp, baǵyt-baǵdar kórsetip keledi. Elena Krýglyhına muny óte qyzyq ári mańyzdy úderis dep sanaıdy.
2025 jyly Almatyda ótken jasóspirimder arasyndaǵy álem chempıonatynda Gorodko taǵy eki medal jeńip aldy. Osylaısha, jasóspirimder arasyndaǵy álem chempıonattarynan jalpy jeti júlde ıelendi. Onyń qorjynynda úsh altyn jáne tórt kúmis medal bar. Sol jyly sportshy eresekter arasyndaǵy álem chempıonatynda mansabyndaǵy ekinshi qola medalin ıelendi.
2026 jyly Mılan men Kortına-d’Ampetstsoda ótken qysqy Olımpıada oıyndarynda Anastasııa parallel mogýl saıysynda shırek fınalǵa deıin jetti. Alaıda bul kezeńde Olımpıadanyń úsh dúrkin kúmis júldegeri, amerıkalyq Djaelın Kaýfqa ese jiberdi.
Qazir 21 jastaǵy frıstaılshy 2030 jylǵy qysqy Olımpıada oıyndaryna daıyndalyp, aldyna naqty maqsattar qoıyp otyr.
– Mindetim – kúsheıip, sportshy ári tulǵa retinde ósý, ózimniń árbir júrisimdegi usaq-túıekke deıin jetildirý, jańa nárseler úırený, – deıdi Anastasııa.
Qazaqstandaǵy mogýl mektebiniń damýy týraly sóz qozǵaǵan Elena Krýglyhına jattyqtyrýshylar men sportshylardyń ázirge bir qalada shoǵyrlanǵanyn atap ótti. Sondyqtan mamandar jappaı sportshy jınaýǵa umtylmaı, áleýeti joǵary atlettermen maqsatty túrde jumys isteýdi jón kóredi.
Onyń pikirinshe, bolashaqta jattyqtyrýshylardyń biri basqa qalaǵa baryp jumys istese, bul mogýl mektebiniń búkil el kóleminde damı bastaǵanyn kórsetetin mańyzdy belgi bolmaq. Al maman komandanyń aýyzbirshiligin tabystyń basty qupııasy dep sanaıdy.
– Taǵy da qaıtalap aıtamyn: biz bólinbeýimiz kerek. Biz – úlken-kishisi, jattyqtyrýshylary bar bir otbasymyz. Árıne, jalaqysy joǵary bolmasa da, balalar jattyqtyrýshysy bolyp jumys isteýge nıetti jastardyń bolǵany mańyzdy. Men ózimniń mysalym arqyly jas áriptesterime eń aldymen kásibińdi súıý, oryndy ambıtsııań bolý, tek aqshaǵa baılanyp qalmaı, óz isińe berilý, únemi úırenip, jetilý jáne bir-birińe kómektesý keregin kórsetkim keledi. Kez kelgen ózekti máseleni sheshýdiń jolyn izdeý qajet. Sonda nátıje de kóp kúttirmeıdi, al onyń artynan qarjylyq múmkindikter de paıda bolady, – deıdi maman.
Bıyl maýsymda Elena Krýglyhına ulttyq quramanyń bas jattyqtyrýshysy qyzmetinen ketip, onyń ornyna Dmıtrıı Barmashov keldi. Al Krýglyhına komandanyń bas keńesshisi qyzmetine aýysty. Onyń pikirinshe, bul – jattyqtyrýshylar shtabynyń ár múshesine kásibı turǵydan damýyn jalǵastyrýǵa múmkindik beretin durys sheshim.
Aǵa býynnyń tájirıbesi, komandanyń aýyzbirshiligi jáne sportshylardyń tabandylyǵy arqasynda Qazaqstannyń mogýl mektebi álemdik arenadaǵy ornyn nyǵaıtyp, halyqaralyq deńgeıde básekege qabiletti ekenin dáleldep keledi.
