Respýblıka azamaty: aqtóbelik para paýerlıftıng rekordshysy jastardy jattyqtyrady
AQTÓBE. KAZINFORM — Aqtóbelik ziltemirshi Bekbolat Oryntaı keıingi úsh jylda 100 keli salmaq dárejesinde aldyna jan salmaı keledi. Para paýerlıftıng sheberi byltyr jáne bıyl rekord ornatty. Sportshy ári jattyqtyrýshy eń mańyzdysy jaqsy nátıje ekenin aıtty. Eń jaqsy nátıje adamǵa senim, kúsh pen qýat beredi.
Bekbolat Oryntaı mektep bitirgen soń qatarlastarynan qalmaı tehnıkalyq salada bilim aldy. Mektepte erkin kúres, djıý djıtsý sportymen qatar ziltemir kóterýge qyzyqty. Qyzyǵýshylyq kún sanap artyp, keıin súıikti sportyna aınaldy. Úzdiksiz jattyǵyp, Maqsut Dáýletqalıevtiń qamqorlyǵynda boldy.
Jertóledegi sport zalynan keıin, arnaıy jattyǵý zalynan tabyldy. Joǵary oqý ornyna túsken soń da sporttan qol úzbedi, tipti jattyqtyrýshy qyzmetin qatar alyp júrdi. Sport sheberine úmitker, keıin sport sheberi ataǵyna qol jetkizdi. Dıplom alyp, Aqtóbege oralǵan soń kózinen aýyr jaraqat alyp, birneshe ret ota jasady. Em-dom birneshe jylǵa sozylǵanymen ol sportqa qaıta oralýǵa bel býdy.
— Birneshe ret ota jasalǵanymen oń nátıje bermedi, bir kózimniń kórý qabileti tómendedi. Dárigerler qorytyndysy shyqqan soń múgedektik rásimdeldi. Arada eki jyl ótkende múgedektigi bar adamdardyń qandaı sportpen shuǵyldanatynyn bilmekke bardym, tanystym, kórdim. Óz júregime jaqyny — para paýerlıftıng. Estigen soń qýandym, jattyǵýymdy bastadym. Men ilimin bilemin, tájirıbem bar. Sóıtip 2024 jyly Qazaqstan chempıonatyna qatysyp, 100 keli salmaq dárejesinde birinshi oryn aldym. Jarys Taldyqorǵan qalasynda ótti. 2025 jyly Taraz qalasynda spartakıada bolyp, onda da birinshi oryndy ıelendim. Rekord jańartqan kez bul. Óz salmaǵym boıynsha 195 kelilik ziltemirdi kóterdim. Bıyl da Aqtaý qalasynda ótken parasportshylar arasyndaǵy Qazaqstan chempıonatynda taǵy rekord jańartyp, 215 keli kóterdim. Biz úsh kezeńge qatysamyz. Ziltemirmen otyryp-turýdan 175 keli, jatyp syǵymdap kóterýden 140 keli, jerden alyp kóterýden 215 keli boldy. Árqaısysynda úsh múmkindik berildi. Aldaǵy ýaqytta halyqaralyq jarystarǵa qatysýdy josparlap júrmin. Sportshynyń tamaqtaný, tynyǵý rejımin saqtap, nátıjeni kúsheıtemiz. Maqsat — álemdik arenaǵa shyǵý, — dedi sportshy Bekbolat Oryntaı.
Para sportshynyń taǵy bir qyry — bapkerligi. Ol ózi qatarly jastarmen qatar erekshe balalardy jattyqtyrady. Ziltemirdi kóterýge qyzyǵatyndar kóp, tek báriniń birdeı densaýlyǵy jaraı bermeıdi.
— Para paýerlıftıngke 10-dan astam adam qyzyǵyp, qatysady. Olar da el birinshilikterine qatysyp, júldeli oryndardan kórinip júr. Erekshe balalar arasynda kózi nashar kóretindermen qatar týa bitti sal aýrýyna shaldyqqan jastar bar. Tirek-qımyl qozǵalysy zaqymdanǵan para sportshylarǵa ziltemirdi jatyp syǵymdap kóterýge ruqsat ǵana bar. Kózi nashar kórse, úsh kezeńge qatysady. Aqtóbede múgedektigi bar jáne para sportshylarǵa arnalǵan «Qýat» sport kesheni jumys istep tur. Sonymen birge «Dostyq» sport kesheninde jattýǵa bolady. Tirek-qımyl qozǵalysy buzylǵan adamdar úshin jattyǵý apparatynyń túri kóp jáne yńǵaıly bolǵany qajet. Bizde osy tusy kemshin. Áli de jattyǵý quraly sanynyń artqanyn, oń nátıje beretin jańa apparattardyń bolǵanyn qalaımyz. Bul sportshylardyń damýyna septigin tıgizedi. Sporttaǵy jaqsy nátıje adamǵa qýat beredi, alǵa jeteleıdi, — dedi ol.
Qol men aıaq bulshyq etterin jattyqtyrýǵa arnalǵan túrli qural-jabdyq adamnyń múmkindigine qaraı emes, jasyna saı bolýǵa tıis. Ár sanattyń óz ereksheligi bolsa, sport jabdyǵy da soǵan saı ózgerýi kerek. Bul talap jattyǵýda ǵana emes, jarysta úlken ról atqarady.
— Elimizde para sport, onyń ishinde para paýfrlıftıng jaqsy damyp keldi. Keıbir óńir alǵa kelip qalǵan. Bizde de sportshy sany artyp, básekelestik ósedi dep oılaımyn. Qatarǵa qosylýdy qalaıtyn adamdardy qabyldaýǵa ázirmiz. Eń birinshiden aýyzbirshilik mańyzdy. Bir bolsaq, talaı qamaldy alamyz, — dedi jas jattyqtyrýshy.
Buǵan deıin eki dúrkin Paralımpıada chempıony jáne Azııa Para oıyndarynyń jeńimpazy, paýerlıfter Davıd Degtıarev týraly jazyldy.
