Respýblıka azamaty: 77 jastaǵy horeograf Ersin Júsipovtyń armany qandaı

Horeografpen suhbattasyp, onyń ómir joly, jas bıshilerdi tárbıeleý tásilderi jáne ulttyq dástúrdi saqtaý ustanymdary týraly áńgimelestik.

Búginde onyń jetekshiligimen «Mıras», «Qazyna» jáne «Aqbota» ansamblderiniń jas bıshileri jattyǵady. Ustaz úshin shákirtteriniń jetistigi — kóp jylǵy eńbektiń basty jemisi ári marapaty.

Hımııa men bıologııadan bı ónerine deıin

Ersin Júsipov — mamandyǵy boıynsha hımııa jáne bıologııa pánderiniń muǵalimi. Alaıda stýdent kezinde bı úıirmesine qatysa bastaǵan ol ýaqyt óte kele osy ónerge birjola den qoıǵan. Horeografııaǵa 50 jyldan astam ýaqytyn arnap, ásirese ulttyq bılerge basymdyq berdi.

Ulǵaıǵan jasyna qaramastan, ustazdyń boıyndaǵy jigeri men qýaty áli de mol. Ol shákirtterimen belsendi jumys istep, ár qımylyna muqııat nazar aýdarady. Bı elementterin ózi kórsetip, oqýshylarynan bar kúsh-jigerin salýdy talap etedi.

Ónerpaz úshin balalardyń bı qımyldaryn jattap alýy ǵana jetkiliksiz. Ol shákirtteriniń bıdiń mán-maǵynasyn túsinip, ony kórermenge jetkize bilýin mańyzdy sanaıdy.

— Balalardyń bıdi shattana bılep, jetistikterine máz bolǵanyn kórgende, ómirimniń bosqa ótpegenin túsinemin. Jaqynda baıqaýǵa baryp, eki shákirtim Gran-prı júldesin jeńip aldy. Olardyń qýanyshynda shek bolǵan joq! Osyndaı sátterde sharshaǵanyń, qajyǵanyń umytylyp ketedi, — deıdi horeograf.

Onyń jetekshiligindegi «Mıras» balalar ansambli túrli baıqaýlarǵa qatysyp, júldeli oryndarǵa ıe bolyp júr. Ustaz bı sheberligin úıretýmen qatar, tártip, jaýapkershilik jáne ónerge degen qurmet sekildi qundylyqtardy shákirtteriniń boıyna sińirýge tyrysady.

Talapshyl tálimger — shákirtterine úlgi

Áleýmettik jelide Ersin Júsipovke qatysty vıdeo tarap, jurt nazaryn aýdardy. Kadrlarda horeograf sahna syrtynda shákirtterine bı qımyldaryn kórsetip, baǵyt-baǵdar kórsetip tur. Kórermenderdi onyń balalarǵa degen qamqorlyǵy erekshe áserge bóledi.

«Mıras» ansambliniń bıshisi Káýsár Bazarbekqyzy Ersin ustazynan eki jyldan astam ýaqyttan beri tálim alyp keledi. Onyń aıtýynsha, pedagog keıde qatal ári talapshyl bolǵanymen, dál osyndaı tásil shákirtterdiń ónerge adaldyǵyn, tártibin qalyptastyryp, sheberligin shyńdaıdy.

— Ersin aǵa óte talapshyl. Jattyǵý kezinde bir nárse oıdaǵydaı shyqpasa, sál daýys kóteretin kezderi bolady. Biraq baıqaýlarda únemi qoldap, maqtap, bizge senim uıalatady. Onyń ár bıge janyn salatyny jáne bıdiń mánin bizge jetkizýge tyrysatyny unaıdy. Biz oǵan qarap boı túzeımiz, - deıdi Káýsár.

Al horeograftyń ózi bı óneri sahnaǵa erekshe qurmetpen qaraýdy talap etedi dep esepteıdi. Ol sahnany ózindik erejeleri men mádenıeti bar qasıetti keńistik dep ataıdy. Ustaz tárbıelenýshilerine muny alǵashqy sabaqtardan bastap úıretedi.

Pedagog shákirtteri bolashaqta kásibı bıshi ári horeograf bolyp, ulttyq ónerdi damytyp, kelesi urpaqqa jetkizedi dep úmit artady. Ersin Júsipovtiń otbasynda da bı óneriniń orny erekshe. Kishi uly jubaıymen birge horeografııamen aınalysady. Al balalarǵa arnalǵan «Mıras» ansambli ataýynyń da máni bar. Ol ustazdyń oqýshylary asyl ónerdi saqtap, jas urpaqqa amanat etedi degen úmitinen týǵan.

Bı ónerindegi urpaqtar sabaqtastyǵy

Ersin Júsipov tek balalarmen ǵana jumys istemeıdi. Ol jasy 65-ten asqan, jergilikti áıelderden quralǵan áýesqoı topqa da sabaq beredi. Zeınetker shákirtteri de bı ónerin meńgerip, baıqaýlarǵa qatysyp, sahnaǵa shyǵyp júr.

Ustazdyń tálimgerleri qatarynda bıge qyzyǵatyn ári ulttyq mádenıetti saqtaýǵa umtylatyn azamattar toby, ıaǵnı «Qazyna» ansambli de bar. Ujymnyń qurylǵanyna bir jyldaı ǵana bolǵan. Soǵan qaramastan, ansambl músheleri kontsertterde óner kórsetip, baıqaýlarǵa qatysyp, túrli is-sharalarǵa atsalysyp júr.

Ansambl solısi Álııa Naımanqulovanyń aıtýynsha, Ersin aǵaı adamdarǵa shabyt berip, olardyń boıyndaǵy qabiletti ashýǵa kómektese biledi. Onyń sózinshe, ujymda 70 jastan asqan adamdar da bar. Olar áli kúnge deıin ónerdiń qyr-syryn horeograftan úırenip, sheberlikterin jetildirip keledi.

— Horeografymyz Ersin aǵa bizdiń bı ónerin meńgerýimiz úshin qajyrly túrde ter tógip jatyr. Onyń eńbekqorlyǵy, talapshyldyǵy jáne shákirtterin qanattandyra biletin qasıetiniń arqasynda biz áli de damyp kelemiz. Aramyzda 50-den, tipti 70 jastan asqandar da bar. Biz onyń úıreter dúnıesi áli de kóp ekenin túsinemiz, — deıdi Álııa.

Onyń aıtýynsha, ustaz shákirtterine qol jetkizgen jetistikterine toqmeıilsip, toqtap qalýǵa jol bermeıdi. Pedagog ujym aldyna jańa maqsattar qoıyp, damýǵa degen umtylysty óshirmeıdi.

Sondaı-aq, ómir salty, is-áreketimen qarttyq shyǵarmashylyqqa kedergi bolmaýy kerektigin kórsetedi. Ansambl músheleri úshin Ersin Júsipov — tek tálimger ǵana emes, ónerge degen ortaq súıispenshilik arqyly olardyń basyn qosqan jan.

Ár bıdiń óz tarıhy bar

Jaqynda Ersin Júsipovke kóp jylǵy eńbeginiń syıy ispetti «Eńbek ardageri» medali berildi. Horeograf bul marapatty kútpegenin aıtyp, mundaı qurmettiń ásirese jas mamandar úshin mańyzdy ekenin atap ótti. Onyń pikirinshe, marapat jas mamandarǵa alǵa umtylýǵa kúsh beredi.

Jarty ǵasyrdan astam ýaqyt ustazdyq etken ol birneshe urpaqtyń sanasy, bolmysy ózgergenine kýá boldy. Onyń baıqaýynsha, qazirgi balalarǵa keıde bir sabaqqa uzaq ýaqyt boıy zeıin qoıý burynǵy tolqyndarǵa qaraǵanda, qıyn. Degenmen, pedagog durys tásil taýyp, balalardyń qyzyǵýshylyǵyn oıata bilse, olardyń kóp nárseni úırenýge qabiletti ekenine senimdi.

Búginde Ersin Júsipov Respýblıka kúnine oraı «Sarbazdar» atty jańa horeografııalyq qoıylym ázirlep jatyr. Ol bı arqyly shákirtterine patrıottyq sezimdi, Otanǵa degen qurmetti jáne ulttyq qundylyqtardy jetkizgisi keledi.

— Men qoıǵan ár bıdiń óz maǵynasy men tarıhy bar. Balalardyń qımyldardy jaı ǵana oryndamaı, qandaı taqyrypta bılep jatqanyn jáne kórermenge ne aıtqysy keletinin túsingeni men úshin mańyzdy. Jaqsy bıshiler men horeograftardy, naǵyz kásibı mamandardy tárbıelegim keledi. Árıne, olardyń óz Otanyn súıgenin de qalaımyn, — deıdi ustaz.

Ersin Júsipov úshin horeografııa jaı ǵana mamandyq emes. Bul — jańa urpaqty tárbıeleýdiń, dástúrdi saqtaýdyń jáne ondaǵan jyldyq eńbek barysynda jınaqtaǵan bilimin ózgelermen bólisýdiń joly.

77 jasynda da ol jattyǵýlar ótkizip, jańa ıdeıalar izdep, shákirtterine jańa mindetter júkteıdi. Mýzyka oınap, oqýshylary sahnaǵa shyqqan saıyn, horeograf baqytty kúıge enedi. Sebebi isiniń ózgeler arqyly jalǵasqany — ol úshin eń basty qundylyq.

Aıta keteıik, buǵan deıin Qazaqstandyq bıshi jasóspirimder Olımpıadasynyń joldamasyna ıe bolǵanyn jazǵanbyz.