Respýblıka aımaqtarynda órt oqıǵalary tolastar emes

Tótenshe jaǵdaılar mınıstrliginiń málimetterine qaraǵanda, osyndaı órtterdiń biri búgin túngi saǵat 1-ler shamasynda Almaty qalalyq ákimshiliginde oryn alǵan, dep habarlaıdy QazAqparat.

Mınıstrliktiń baspasóz málimetteri boıynsha, tótenshe jaǵdaı jónindegi habar mınıstrlik ókilderine túngi saǵat 1-den 14 mınýt ótkende kelip túsken. Órt ákimdiktiń baspasóz qyzmetiniń bólmesinde shyqqan. Tótenshe jaǵdaılar qyzmetiniń ókilderi órtti túngi 2 saǵat 30 mınýt shamasynda sóndirgen. Zardap shekkender joq. Sondaı-aq búgin túngi 1 saǵat 28 mınýt shamasynda Almatydaǵy №40 balalar qalalyq klınıkalyq aýrýhanasynda órt shyqqandyǵy jóninde órt sóndirýshilerge habar kelip túsken. Onda kúıikke qarsy emdeý sharalaryn júzege asyratyn «Klımıtron» qurylǵysy órtengen. Órtti aýyzdyqtaý barysynda 26 adam qaýipsiz aımaqqa kóshirildi. Zardap shekkender joq. Al Pavlodarda qańtardyń 12-si kúni 6 saǵat 45 mınýtta «Toıota Lend Krýzer» avtokóligine jalǵanǵan gaz qurylǵysyn durys paıdalanbaýdyń saldarynan gaz ballony jaryldy. Nátıjesinde kólik turaǵy kooperatıvi órtenip, «Toıota Lend Krýzer» kóliginen 1956 jyly týylǵan V.Krıýk atty azamattyń máıiti tabyldy. Órt 10 saǵat 17 mınýt shamasynda aýyzdyqtaldy. Sondaı-aq Soltústik Qazaqstan oblysy Petropavlov qalasynyń Amangeldi kóshesinde ekipáterli jeke úıden órt shyǵyp, 20 sharshy metr aýmaqty jalyn sharpydy. Órttiń saldarynan osy úıde turatyn 1973-shi jáne 1970 jyly týylǵan eki azamat tútinge ýlanyp aýrýhanaǵa jetkizildi.