Respýblıka aýmaǵyndaǵy barlyq paromdar tekseriledi - Kólik jáne kommýnıkatsııa mınıstrligi
ASTANA. Sáýirdiń 8-i. QazAqparat /Rýslan Ǵabbasov/ - Respýblıka aýmaǵyndaǵy barlyq paromdar tekseriledi.
Bul týraly búgin Astanada ótken keńeste QR Kólik jáne kommýnıkatsııa mınıstrliginiń kóliktik baqylaý komıteti tóraǵasynyń orynbasary Erlan Jumashev málim etti, dep habarlaıdy QazAqparat.
«Keme, sý kóligi joldaryndaǵy nysandardy qadaǵalaý maqsaty tur. Kópirler boıynsha biz «Sý kóligi júzetin kópir» atty jeke aktsııa ótkizýdi kózdep otyrmyz. Óz kezeginde barlyq kópirler men basqa da gırdrotehnıkalyq qurylǵylardyń ıelerin sý kólikterin qaýipsiz túrde ótkizýdi qamtamasyz etý talaptaryn saqtaýdy mindetteımiz», - dedi ol.
Jaqynda Otyrar aýdanynda ózenniń ekinshi betine ótip bara jatqan paromnan bir avtokólik ishindegi adamdarymen sýǵa qulap, qaıǵyly oqıǵa oryn alǵanyn eske salyp ótken E. Jumashev, «qazirgi kezde bul oqıǵa boıynsha tekseris júrgizilýde», dedi.
«Osyǵan baılanysty respýblıka aýmaǵyndaǵy barlyq paromdar boıynsha bólek tekseris júrgizý qajet. Atap aıtqanda, paromdarǵa qatysty arnaıy aktsııany jarııalaý kerek. 2 aptanyń ishinde bul jumystardy júrgizip, kóliktik baqylaý komıtetine esep berý qajet», - dedi E. Jumashev.
Sondaı-aq ol keńeste Tótenshe jaǵdaılar mınıstrliginiń sýda qutqarý qyzmetterimen tyǵyz baılanysta jumys isteý sharalaryn belgiledi.
