Respýblıka aýmaǵynda sapasyz azyq-túlik ónimderiniń 3 myńnan astam partııasy satylymnan alyndy
TANA. 2 qarasha. QazAqparat /Marlan Jıembaı/ - Respýblıka aýmaǵynda sapasyz azyq-túlik ónimderiniń 3 myńnan astam partııasy satylymnan alyndy.
Bul týraly búgin 9 aıdyń qorytyndysyna arnalǵan baspasóz máslıhatynda QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıtetiniń tóraǵasy Ryskeldi Sátbaev málim etti.
Onyń atap ótýinshe, Qazaqstan aýmaǵynda jalpy somasy 729 mıllıon teńgege jýyq sapasyz jáne sáıkestik sertıfıkaty joq azyq-túlik ónimderiniń 3 myńnan astam partııasy anyqtalyp, satylymnan alynǵan.
Máselen, Ýkraınanyń «Odesskıı konservnyı zavod» JAQ shyǵarǵan qutydaǵy jasyl burshaqta qorǵasynnyń shamadan tys kóp ekendigi anyqtalǵan. Sonymen qatar tehnıkalyq reglamentterdi Shveıtsarııa, Qytaı, Qyrǵyzstan óndirýshileri buzyp otyr. atalǵan fakti elimizdiń sanıtarlyq-epıdemıologııalyq qadaǵalaý organdaryna habarlanǵan.
