Respýblıka aýmaǵynda «Kendir-2011» keń aýqymdy operatsııasy ótkizilip jatyr
ASTANA. 22 maýsym. QazAqparat - Respýblıka aýmaǵynda «Kendir-2011» keń aýqymdy operatsııasy ótkizilip jatyr. Bul shara jyl saıyn maýsymnan bastap qazan aıy aralyǵynda ótkiziledi.
Operatsııanyń basty maqsaty - Shý alqabynan esirtki daıyndaý, sondaı-aq shyǵarý arnalaryn anyqtaý jáne jolyn kesý, barlyq óńirlerde «aýǵandyq» esirtkilerdiń trafıgi arnalaryn joıý, esirtki bıznesine mamandanǵan uıymdasqan qylmystyq toptardyń (qoǵamdastyqtardyń) qylmystyq áreketterin anyqtaý jáne jolyn kesý boıynsha maqsatty is-sharalardy júrgizý bolyp tabylady, dep habarlaıdy Qazaqstan Respýblıkasy ІІM Esirtki bıznesine qarsy kúres komıteti.
Uıymdastyrýshylyq máselelerdi sheshý jáne operatsııaǵa basshylyq etýdi júzege asyrý úshin quqyq qorǵaý organdary ókilderiniń quramynan ІІM Esirtki bıznesine qarsy kúres komıtetiniń bazasynda Jedel shtab quryldy.
Aǵymdaǵy jyldyń 20 mamyrynda Ońtústik Qazaqstan oblysynyń Shymkent qalasynda ІІM Esirtki bıznesine qarsy kúres komıteti basshylyǵynyń, Astana, Almaty qalalarynyń, oblystardyń jáne kóliktegi ІІD-niń esirtki bıznesine qarsy kúres basqarmalarynyń bastyqtarynyń qatysýymen operatsııany ashý jóninde nusqamalyq keńes ótkizildi.
Jambyl oblysyna «Kendir - 2011» operatsııasyn ótkizý kezeńinde marıhýanany jınaý jáne áketý, quramynda esirtki bar ósimdikterdi ósirýdiń jolyn kesý, esirtki kontrabandasy faktilerin anyqtaý maqsatynda basqa óńirlerdegi ishki ister organdarynan aı saıyn 50 qyzmetkerden qosymsha jiberilýde.
Jambyl oblysynyń negizgi magıstraldi tas joldarynda qosymsha beketter ashyldy, jergilikti avtomobıl joldary men qumdy aımaqtar mobıldik toptarmen kúzetiledi.
Operatsııany ótkizý kezeńinde arnaıy daıyndalǵan qyzmettik-izdestirý ıtteri keńinen paıdalanylady.
Qarasora jabaıy ósetin oryndardy jáne esirtkini daıyndaý faktilerin anyqtaý maqsatynda Jambyl oblysynyń ІІD «Delta-Dolına» óńiraralyq esirtki bıznesine qarsy kúres bóliminiń qyzmetkerleri apta saıyn «An-2» ushaǵymen jáne «Mı-2» tikushaǵymen Shý alqabyn baqylaýdy júzege asyrady. Sonymen qatar operatsııaǵa ІІM Іshki áskerler komıtetiniń áýe kúshteri tartylǵan.
«Kendir-2011» operatsııasynyń alǵashqy 20 kúninde «Delta-Dolına» ÓEBQKb-niń qyzmetkerleri jáne issaparǵa jiberilgen qyzmetkerler zańsyz aınalymnan 2,9 tonnadan astam marıhýana aldy. Elimizdiń basqa óńirlerinde de belsendi jumys júrgizilýde.
Aǵymdaǵy jyldyń 1-20 maýsymy aralyǵynda 283 esirtki qylmysy, onyń ishinde esirtki satýdyń 125 faktisi tirkeldi. Zańsyz aınalymnan 4,3 tonna esirtki, onyń ishinde 14,5 kg geroın alyndy.
