Respýblıka alańyndaǵy «Almaly» saýda-demalys kesheni 2011 jyldyń naýryz aıynda paıdalanýǵa beriledi
ALMATY. Maýsymnyń 1-i. QazAqparat /Erbol Azanbek/ - Almatydaǵy Respýblıka alańynda salynyp jatqan «Almaly» saýda-demalys kesheniniń qurylysy aıaqtalýǵa jaqyn.
Bul týraly búgin BAQ ókilderimen kezdesken «Almaly treıd» JShS dırektory Gúlshat Nurpeıisova aıtty, dep habarlaıdy QazAqparat.
Gúlshat Nurpeıisovanyń sózine qaraǵanda, keshenniń ústińgi qabaty 90 paıyzǵa daıyn. «Qazir kógaldandyrý jumystary júrgizilip jatyr. Aldaǵy 2-3 kúnde alań ashylyp, qozǵalysqa múmkindik týady», deıdi kompanııa basshysy.
Onyń aıtýynsha, ústińgi qabattyń aýmaǵy 15 myń sharshy metr. Bunda 10 sýburqaq, balalar alańy, qysta muz aıdyny, rolıkdrom, kógaldandyrylǵan shaǵyn saıabaq oryn tebedi. Al jer astyna 2 qabatty saýda ortalyǵy men 3 qabatty kólik turaǵy salynýda. Bulardyń jalpy kólemi 25 myń sharshy metr. «Qazirgi ýaqytta ishki qabattyń 70 paıyzy, kommýnıkatsııalyq júıelerdiń 50 paıyzy jasalyp bitti. Almatyda jer silkinisiniń qaýiptiligi 9+1 ball. Sondyqtan qurylys jumystary osyndaı kúshke shydamdy etip jasalýda. Buny 10-ǵa jýyq quzyrly organdar kúndelikti tekserip otyrady», deıdi G.Nurpeıisova. Jalpy quny 35 mıllıon dollarlyq saýda-demalys kesheni keler jyldyń naýryz aıynda tolyq paıdalanýǵa beriledi.
Almatylyqtar men qala qonaqtary ázirge tek saýda ortalyǵynyń Respýblıka alańymen jalǵasqan ústińgi qabatyn ǵana tamashalaı alady.
