Respublica partııasynyń basshylyǵyna jastar jumyldyryldy - Syrymbek Taý

ASTANA. QazAqparat – Búgin elordada Respublica partııasynyń kezekten tys sezi ótip jatyr. Partııanyń teń tóraǵasy Syrymbek Taý aldaǵy saılaýǵa usynylatyn kadıdattar týraly aıtyp berdi, dep habarlaıdy QazAqparat.

«Partııa teń tóraǵalarynyń ortasha jasy 35 shamasynda. Májiliske partııalyq tizim boıynsha 25 kandıdat, al bir mandatty júıe boıynsha 5 adam baq synaıdy», - dedi Syrymbek Taý.

Osy oraıda ol partııaǵa múshe retinde kóbine jastar tartylǵanyn, olardyń birazy kásipkerlik salada qyzmet etip júrgenin aıtty.

«Májiliske bizdiń partııa atynan kandıdattar ense, olardyń zań shyǵarý salasyndaǵy jumys isteýge saýaty jetedi dep oılaımyn. Jalpy, bizdegi jigitter men qyzdar óz jumysynda tájirıbe jınaqtaǵan. Ary qaraı Májiliske barǵan kezde biz óz úlesimizdi qosamyz. Bizdiń kózqarasymyz jan-jaqty bolady», - dedi partııanyń teń tóraǵasy.

Búgingi is-sharaǵa partııa tóraǵasy Aıdarbek Hodjanazarov, teń tóraǵalar - Syrymbek Taý, Rýslan Berdenov, Maksım Baryshev, Dınara Shúkijanova, Qýanysh Shonbaı, Beıbit Álibekov jáne Nurlan Qoıanbaev, sondaı-aq Respýblıka partııasynyń 20 aımaqtyq fılıalynyń ókilderi, belgili qazaqstandyq kásipkerler men qoǵam qaıratkerleri qatysyp jatyr.