Respublica partııasy saılaýǵa 76 kandıdat usyndy
ASTANA. KAZINFORM — Elordada Respublica partııasynyń kezekten V tys sezi ótti. Oǵan partııa basshylyǵy, Ortalyq jáne óńirlik keńesterdiń músheleri, fılıal tóraǵalary, depýtattar, sondaı-aq Respublica Jastary jáne ReWomen qaýymdastyqtarynyń belsendileri qatysty.
Respublica partııasy saılaýaldy naýqanǵa resmı túrde kiristi. Delegattar partııanyń aldaǵy damý baǵytyn aıqyndap, aldaǵy elektoraldy kezeńge qatysty negizgi sheshimderdi qabyldady.
«Bizdiń basqa Otanymyz joq. Birtutas ult bolyp jumylyp, qoǵamdy biriktire alsaq, kez kelgen belesti baǵyndyryp, aldymyzǵa qoıǵan maqsattarǵa qol jetkizemiz», — Prezıdent Qasym-Jomart Toqaevtyń Parlament palatalarynyń sońǵy birlesken otyrysynda aıtqan osy sózi jańa saıası kezeńniń basty baǵdaryna aınaldy.
Sezde partııanyń úsh jyldaǵy jumysy qorytyndylandy. Osy ýaqyt ishinde Respublica óz baǵdarlamasyn zań shyǵarý qyzmeti, qoǵamdyq bastamalar jáne óńirlik jelini damytý arqyly júıeli túrde iske asyrdy. Partııa depýtattary ondaǵan zańnamalyq bastama kóterip, depýtattyq saýaldar joldady, azamattardyń 12 myńnan astam ótinishin qarady, jastar men áıelderge arnalǵan iri bilim berý jobalaryn júzege asyryp, partııanyń kadrlyq rezervin qalyptastyrdy.
Delegattar partııa Jarǵysyna ózgerister men tolyqtyrýlar engizýdi qoldady. Qujat jańa Konstıtýtsııa talaptaryna sáıkestendirilip, partııaishilik basqarý júıesin jetildirýge, Ortalyq apparat pen óńirlik qurylymdardyń jumys tıimdiligin arttyrýǵa, sondaı-aq ashyqtyq pen ishki partııalyq demokratııany kúsheıtýge baǵyttalǵan. Ózgerister qoǵamdyq qatysý tetikterin keńeıtýdi, óńirlik uıymdardyń rólin arttyrýdy jáne kadrlyq rásimderdi jetildirýdi kózdeıdi.
Sezdiń negizgi sheshimderiniń biri — Respublica partııasynyń jańa saılaýaldy baǵdarlamasyn bekitý boldy. Qujat «Azamattyń ıgiligi — Jaýapty qoǵam — Tıimdi memleket — Qaýipsiz el» qaǵıdatyna negizdelgen. Baǵdarlama kásipkerlikti qoldaý, jańa jumys oryndaryn qurý, memlekettik basqarýdy jańǵyrtý, bilim berý men densaýlyq saqtaý sapasyn arttyrý, tsıfrlandyrý, quqyqtyq ınstıtýttardy nyǵaıtý, adamı kapıtaldy damytý jáne qoǵamdyq qaýipsizdikti qamtamasyz etýge baǵyttalǵan naqty bastamalardy qamtıdy.
Baǵdarlamany tanystyrǵan partııa tóraǵasy Aıdarbek Qojanazarov:
— Qazaqstannyń basty baılyǵy — jer qoınaýyndaǵy qazba baılyq emes, onyń adamdary. Biz ekonomıkany tyńdaıtyn, jańa salalardy qoldaıtyn jáne adal básekeni qorǵaıtyn memleket qurý úshin jumys isteımiz, — dedi.
Partııanyń teń tóraǵasy Dınara Shúkijanova baǵdarlamanyń ındýstrııalyq blogyn tanystyryp, naqty sektordy qoldaý basymdyqtaryna toqtaldy.
— Men mashına jasaý salasynda jumys isteımin jáne qazaqstandyq óndirýshilerdiń kúndelikti kezdesetin máselelerin jaqsy bilemin. Sondyqtan bazalyq salalardy damytýǵa arnalǵan naqty ári eseptelgen sheshimder qajet, — dedi ol.
Sezde saılaýǵa qatysatyn Respublica partııasynyń kandıdattar tizimi de bekitildi. 76 kandıdattan qurylǵan tizim jańarý, kásibılik jáne keń qoǵamdyq ókildik qaǵıdattary negizinde jasaqtalǵan. Kandıdattardyń ortasha jasy — 40,9 jas. Tizimge 44 er azamat, 32 áıel, 11 jas, múgedektigi bar 3 azamat, sondaı-aq PolitIQ mektebi men partııanyń kadrlyq rezervinen shyqqan 10 túlek endi.
Delegattar partııa tóraǵasy Aıdarbek Qojanazarovtyń ókilettik merzimin taǵy úsh jylǵa uzartý týraly sheshim qabyldap, Baqylaý-tekserý komıssııasynyń jańartylǵan quramyn bekitti.
Sezd qorytyndysynda partııa basshylyǵy Respublica uıymdastyrýshylyq qalyptasý kezeńin aıaqtap, jańa saılaýaldy baǵdarlamamen, kásibı komandamen jáne eldi damytýǵa arnalǵan naqty usynystarmen saıası damýdyń kelesi kezeńine qadam basqanyn málimdedi.
Kezekten tys V sezge Qazaqstannyń barlyq óńirinen delegattar oflaın jáne onlaın formatta qatysty.
Kún tártibinde alty másele qaraldy: úsh jyldyq jumystyń qorytyndysy, partııa tóraǵasyn saılaý, Jarǵyǵa ózgerister engizý, saılaýaldy baǵdarlamany bekitý, Baqylaý-tekserý komıssııasynyń quramyn jańartý jáne partııalyq kandıdattar tizimin usyný.
Aıta ketıeıik, «Respublica» partııasy tóraǵasy Aıdarbek Qojanazarovtyń ókilettigi úsh jylǵa uzartyldy.
