Respublica partııasy Premer-Mınıstr laýazymyna Oljas Bektenovtyń kandıdatýrasyn qoldady
ASTANA. KAZINORM – Respublica partııasy Premer-Mınıstr laýazymyna Oljas Bektenovtyń kandıdatýrasyn qoldady.
«Dál osy shaqta bárimiz de elimizdegi aýqymdy ózgeristerdiń kýási bolyp otyrmyz. Al ekonomıkalyq damý baǵytyndaǵy qol jetkizgen kórsetkishter oń bolǵanymen, qarqyndy ózgerister baıqalmaıdy. Úkimet ınertsııalyq damý qaýpin eńsere almady. Bul rette álem elderi de bir ornynda turǵan joq. Básekelestiktiń qarqyny údep barady. Ýaqyt óte az. Munaıǵa joǵary baǵanyń bolýy, basqa da «múmkindikter terezesi» tarylyp barady. Mundaı jaýapty da tarıhı kezeńde el ekonomıkasy antıkrızıstik qana emes, áldeqaıda qýatty, utymdy, jedel is-áreketterdi qajet etedi. Memleket basshysy «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda aıtqan Elimizdiń myqty ónerkásiptik negizin qalyptastyrý jáne ekonomıkamyz ózimizdi tolyq qamtamasyz ete alatyn jaǵdaıǵa jetý máselelerine erekshe kóńil qoıýymyz kerek», - dedi «Respublica» partııasy fraktsııasynyń jetekshisi Aıdarbek Hodjanazarov.
Onyń atap ótýinshe, ekonomıkanyń damýyn qamtamasyz etetin is-sharalarǵa qarajat bıýdjette jetkiliksiz. Biraq «bıýdjet ol máseleniń túbiri emes, ol tek saldary ǵana». Máseleniń túp-tórkini, sol qazynany toltyratyn ekonomıkanyń áleýetinde bolyp tur. Damyǵan shet elderde memlekettik bıýdjettiń kirisi jalpy ishki ónimniń 35-50 paıyzdy quraıdy. Mundaı jaǵdaıda bıýdjet kirisi qazirgideı 20 trln emes, 50 trln teńge bolýy kerek edi. Osyndaı tabyspen elde eń tómengi jalaqy 85 myń, al eń tómengi zeınetaqy 57 myń teńge bolmas edi.
«Sondyqtan da ekonomıkalyq ósim men bıýdjetti tolyqtyrýdyń jańa qaınar kózderin zerdeleý qajet. Áıtpese nashar nemese óte nashar sheshimder arasynda tańdaý jasalanyp otyrady. Úkimettiń jańa quramy ótkennen sabaq alyp, óz qyzmetin jetildirý boıynsha júıeli sharalar qabyldaýy qajet. Postqantarlyq Úkimettiń ekonomıkanyń barlyq salasynda qurylymdyq ózgeristerge baǵyttalǵanyna qaramastan, Úkimettiń otstavkasy kópten kútildi. Óıtkeni Úkimet 2029 jylǵa qaraı jalpy ishki ónimniń eki ese ósýine berik negiz jasady dep aıtýǵa bolmaıdy. Prezıdent kórsetken jańa ekonomıkalyq modeldiń aıasynda, elimizdiń barlyq artyqshylyqtaryn paıdalana otyryp, túbegeıli ekonomıkalyq serpilis jasaýymyz kerek. Biz, Respublica partııasynyń fraktsııasy, usynylǵan premer-mınıstrdiń kandıdatýrasyn qoldaı otyryp, Qazaqstan azamattarynyń ál-aýqatynyń jaqsarýy men el ekonomıkasynyń jandanýyna birlesip aıanbaı eńbek etýge daıynbyz. Bizdińshe, jańa premer-mınıstrdiń ortalyq jáne óńirlik deńgeıde jumys isteý barysynda jınaǵan mol tájirıbesi Qasıetti Atamekenimizdiń básekege qabilettiligin kóterip, halqymyzdyń áleýmettik jaǵdaıynyń jaqsarýyna aıryqsha yqpal etedi dep senemiz», - dedi partııa jetekshisi.
