Respublica partııasy Aıtýar Qoshmambetovty Májilis depýtaty retinde usyndy

ASTANA. KAZINFORM – Dınara Shúkijanovanyń ornyna Respublica partııasynan Májilis depýtaty kim bolatyny belgili boldy.

«Respublica partııasynyń elordalyq keńsesinde partııanyń Ortalyq keńesiniń 5-shi otyrysy ótti. Byltyrǵy jumystyń qorytyndylary qaralyp, qazirgi kezeńge josparlar belgilendi. Respublica partııasy Ortalyq keńesiniń qaýlysymen Aıtýar Qoshmambetov QR Parlamenti Májilisi depýtaty retinde usynyldy. Tıisti sheshim QR Ortalyq saılaý komıssııasyna joldandy», - delingen partııanyń aqparatynda.

Buǵan deıin Aıtýar Qoshmambetov Almaty qalasyndaǵy partııa fılıalynyń tóraǵasy qyzmetin atqarǵan.

Ol 1986 jyly 29 qarashada dúnıege kelgen. Halyqaralyq quqyq mamany. Prokýratýra organdarynda jumys istedi, Almaty qalasynyń kásipkerler palatasyn basqardy.

Budan buryn habarlanǵandaı, bıyl qańtar aıynyń aıaǵynda Parlament Májilisiniń jalpy otyrysynda depýtat Dınara Shúkijanovanyń ókilettigi merziminen buryn toqtatyldy.

Ol mindetterin atqarýdan óz erkimen bosatý týraly ótinish berdi. D. Shúkijanova Respublica partııasynyń teń tóraǵasy bolyp qala beretinin jáne óńirdegi óndiriske oralatynyn jarııalady.

Eske salsaq, byltyr naýryzda Májilis depýtattaryn saılaý naýqanyna elimizde resmı tirkelgen 7 partııanyń barlyǵy qatysty. Olardyń ishinde tek «Baıtaq» partııasy ǵana shekti 5 paıyzdyq mejeden asa almady. Al Amanat partııasy saılaýshylardyń – 53,90, «Aýyl» halyqtyq-demokratııalyq partııasy – 10,90, Respublica partııasy – 8,59, «Aq jol» Qazaqstan demokratııalyq partııasy – 8,41, Qazaqstan halyq partııasy – 6,8, Jalpyulttyq sotsıal-demokratııalyq partııasy – 5,20 paıyz daýysyn jınady. 5 jáne odan da kóp paıyz daýys jınaǵan saıası partııalardyń arasynda Respublica partııasyna Májiliste 6 mandat buıyrdy.