Respondentterdiń 77,1 paıyzy Toqaevtyń reformalaryna senim artatynyn bildirdi - saýalnama
ASTANA. KAZINFORM - Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýty bıylǵy 11 mamyr men 22 maýsym aralyǵynda áleýmettik saýalnama júrgizdi. Oǵan 17 oblys pen Astana, Almaty, Shymkent sııaqty respýblıkalyq mańyzy bar qalalardan 18 jastan asqan 8000 respondent qatysty.
Qoǵamdyq pikirdi zertteý nátıjelerine sáıkes, Qazaqstan Respýblıkasynyń Prezıdentine respondentterdiń 77,1 paıyzy senim bildiretini belgili boldy. Bul rette birqatar zańdylyqty eskere otyryp, Memleket basshysyna senim artqan azamattardyń ortasha portretin kórsetýge bolady.
- Birinshiden, Prezıdentke kóbirek senim artatyndardyń kópshiligi jastar (81,9%).
- Ekinshiden, respondentterdiń bilim deńgeıi neǵurlym joǵary bolsa, olardyń Memleket basshysyna degen senimi de joǵary.
- Úshinshiden, Memleket basshysyna senim deńgeıi aýyl turǵyndary (79,6%) jáne qala turǵyndary (75,4%), áıelder (79%) jáne erler (74,9%) arasynda shamamen birdeı ekenin atap ótken jón.
- Tórtinshiden, bilim, ónerkásip, qyzmet kórsetý, kólik jáne aýyl sharýashylyǵy salalarynda qyzmet etetinder Prezıdentke kóbirek senim artady.
Álemde saıası ınstıtýttarǵa degen senimniń tómendeýi sııaqty jalpy úrdis baıqalady. Taıaý Shyǵys pen Shyǵys Eýropadaǵy geosaıası ózgerister, pandemııa, ınflıatsııa saldarynan ómir súrý qunynyń ósýi jáne kóptegen elderdi sharpyǵan ekonomıkalyq daǵdarys saıası ınstıtýttarǵa degen senimniń tómendeýiniń sebepterin túsindiredi.
Bul turǵyda Qazaqstan kóptegen eldermen salystyrǵanda jaqsy jaǵynan erekshelenedi. Memlekettiń kezeń-kezeńimen saıası jańǵyrýy, kóppartııalyq júıeni damytýǵa baǵyttalǵan zańdar, jergilikti jáne aýdan ákimderin saılaý, «Halyq únine qulaq asatyn memleket» formýlasyn júzege asyrý – osynyń barlyǵy Prezıdenttiń Ádiletti Qazaqstan tujyrymdamasyn is júzinde júzege asyrýdyń kórinisi.
Áleýmettanýlyq zertteýlerdiń nátıjeleri kórsetkendeı, Qasym-Jomart Toqaevtyń ashyq jáne ádil qoǵam qurýǵa, azamattardyń ál-aýqatyn arttyrýǵa baǵyttalǵan reformalary, saıyp kelgende, Prezıdenttiń qoǵamdaǵy joǵary reıtıngine negiz boldy.
