Respondentterdiń 90 paıyzy jyl saıyn skrınıngilik tekserýden ótýge ázir - saýalnama
ASTANA. 10 qarasha. QazAqparat - QR Premer-Mınıstriniń PM.kz resmı saıtynda júrgizilgen saýalnama qorytyndysy boıynsha respondentterdiń 90 paıyzy jyl saıyn profılaktıkalyq medıtsınalyq tekserýden (skrınıng) ótýge ázir.
Caýalnamaǵa qatysqandardyń 90 paıyzy jyl saıyn medıtsınalyq tekserýden ótip turýǵa nıetti ekenderin bildirgen. Onyń ishinde, 76 paıyzy «óz densaýlyǵynyń jaǵdaıyn bilip otyrǵysy kelse», 14 paıyzy - tegin bolǵandyqtan, medıtsınalyq tekserýden ótýge ázir.
Al 10 paıyzy medıtsınalyq tekserýden ótýge qulyqsyz ekenderin aıtyp otyr.
Qazaqstanda Ulttyq skrınıngilik baǵdarlama 2011-2015 jyldarǵa arnalǵan «Salamatty Qazaqstan» baǵdarlamasynyń bir baǵyty retinde aǵymdaǵy jyldyń basynda qolǵa alynǵan bolatyn.
Densaýlyq saqtaý mınıstrliginiń málimeti boıynsha, 2011 jyldyń 9 aıynda 2 mıllıonnan astam eresek azamat skrınıngilik tekserýden ótken.
«Premer-Mınıstrdiń saıtynda jańa saýalnama júrgizilýde. «Bıznestiń jol kartasy-2020» baǵdarlamasyna arnalǵan bólimge kirip, «Óz isińizdi ashýǵa daıynsyz ba?» degen saýalǵa óz pikirlerińizdi bildirýlerińizge bolady», - dep habar taratypty QR Premer-Mınıstriniń PM.kz resmı saıty.
