Respondentterdiń 14 paıyzy Halyqty jumyspen qamtý ortalyqtaryna júgingen - saýalnama
Saýalnamaǵa jaýap bergenderdiń 10 paıyzy Jumyspen qamtý ortalyqtaryna júginip, áleýmettik kelisimshartqa otyrǵan. Taǵy 4 paıyzy «Jumyspen qamtý-2020» baǵdarlamasynyń arqasynda jumys tapqan.
Degenmen, respondentterdiń 42 paıyzy «turaqty jumystary bar bolǵandyqtan» jumyspen qamtý ortalyqtaryna barmaǵan. 44 paıyzy Jumyspen qamtý ortalyǵynyń kómeginsiz jumys izdegendi jón kóretinderin aıtqan.
Esterińizge sala keteıik, «Jumyspen qamtý-2020» baǵdarlamasy 2011 jyly ilki rejimde júzege asyrylǵan bolatyn. Óńirlerde qurylǵan halyqty jumyspen qamtýdyń 204 ortalyǵy 2011 jyldyń 1 shildesinen bastap azamattardy qabyldap jatyr.
2011 jyly Baǵdarlamaǵa qatysýǵa nıet bildirgenderdiń jalpy sany 84,1 myń adamdy quraǵan, olardyń ishinde 58,6 myń adam áleýmettik kelisimshartqa otyrǵan. 69,3 myń adam kásiptik oqýmen qamtylyp, olardyń 31 myńy oqýlaryn aıaqtaǵan jáne 16 myń adam turaqty jumys oryndaryna turǵyzylǵan. Taǵy 16,2 myń adam áleýmettik jumys oryndarymen qamtylǵan.
2011 jyly Baǵdarlama aıasynda 38 myńnan astam jańa jumys tapqan, 1435 qatysýshy shaǵyn nesıeler alǵan (nesıeniń ortasha somasy - 1 862 myń teńge). Respýblıkanyń 10 oblysynda eńbek resýrstarynyń jınaqylyǵyn arttyrý maqsatynda erikti qonys aýdarýshylar úshin 212 jeke turǵyn úı men kóppáterli 13 úı salyndy.
2012 jyly «Jumyspen qamtý-2020» baǵdarlamasyna ózgertýler men tolyqtyrýlar engizilgeli otyr. Atap aıtqanda, Baǵdarlamaǵa aýyldyq eldi mekenderdi damytýdy qarastyratyn jańa tórtinshi baǵyt engizilýde jáne baǵdarlamaǵa qatysýshylar tapsyratyn qujattardyń sany azaıtylmaq.
Bul tolyqtyrýlar Elbasynyń «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Joldaýymen júktelgen mindetterdi eskere otyryp ázirlenip otyr.
pm.kz saıtynda «Qoljetimdi baspana-2020» baǵdarlamasyna qatysasyz ba (Turǵyn úı qurylys jınaq júıesi boıynsha) degen saýalǵa negizdelgen jańa saýalnama júrgizilýde.